PATHIAN KHAWNGAIHNA DAWN DAN

  _Hmangaihna Thumal Ropui Pasarih_

  

- Rick Warren

- Apr 1, 2025

 

“Dan thu Mosian a pe, khawngaihna leh thutak Isua Krista avangin a lo awm.” Johana 1:17

 

Nimin lamah khan Pathian khawngaihna kan dawn avanga kan hlawkpuina kawng 10 kan sawi tawh a. Kha thu i chhiar atang khan engtin nge khawngaihna chu i dawn theih ang tih i ngaihtuah maithei e - a chhan chu Pathian khawngaihna pawm si lo hian Pathian khawngaihna avanga i chan tur hi i beisei ang tih a hlauhawm a ni.

 

Engtin nge i nunah Pathian khawngaihna chu i dawn tak ang?

 

Zawhna leh chhanna awm duah lam a ni lo. Hre turin Pathian thu zirnaa luh kher a ngai lo.

 

Bible chuan awlsamtakin, Isua Krista kaltlanga Pathian khawngaihna i dawn dan tur a lo sawi a ni.

 

Bible chuan, “Dan thu Mosian a pe, khawngaihna leh thutak Isua Krista avangin a lo awm.” Johana 1:17

 

Pathian khawngaihna chu mi pakhat Isua avangin a awm. Sakhuana emaw serh leh sang hmangin i nei thei lo. Heng thute hmang hian i nei thei ang.

 

Isua kaltlangin i nei thei a ni.

 

Pathian khawngaihna chu a thlawn a ni a. Lo pawm tawp kha a ni mai.

 

I han sawi chiang leh law law teh ang. Pathian khawngaihna chu a tlawm lo va. Isuan a man a pe a ni. Khawngaihna chu thil man to tak a ni. Isuan krawsah a man pein a tlak a ni.

 

Krawsa Isua thihna avang chuan kan nunah thil pathum lo thleng a awm a:

 

* Sual man bat a tlak.* Sual man bat chu tlaktu an awm a ngai a. Isua nena inlaichinna in neih chuan, i sual man bat chu a tlaksak ang che.

 

*Sual thiltihtheihna a titlawm.* Krawsa Isua thihna avang chuan i tih thin sual zawng zawngte kalsan theihna thiltihtheihna a pe che a ni.

 

*Sualna chuan kian hun a nei ang.* Engtikniah emaw chuan Isua zuitu zawng zawngte chu vanramah an kal ang, chutah chuan sualna zawng zawng a bo vek tawh ang.

 

Pathian khawngaihna man to tak chuan i nun danglam vekna tur pek a tiam che a ni.

 

Lo pawm tawp kha i tihtur chu a ni.

 

Ngaihtuah zui atan

 

* I nun chuan engtinnge khawngaihna avangin Pathiana i lawmzia i lantir?

 

* Pathian khawngaihna chu dawn awlsam tak leh hlawkna tam tak nei a ni a, engvangin nge mi tam tak hian an la pawm loh nia i hriat?

 

* Engtin nge Pathian khawngaihna chu i thiante emaw chhungte emaw hnenah tunkar chhung hian i hrilh theih ang?

 

*Pathian khawngaihna chang turin i inpeih em?*

 

Bible chuan Pathian Fapa Isua Krista rinna avang chauha vanram kai thei kan nihzia min hrilh. Vanram hi thawh chhuah chi a ni lo. _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

 

Isua hnenah i inhlan duh takzet anih chuan heti hian ṭawngṭai rawh le:

"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

 

"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

 

*[Lettu: Sangpuia]*