Mizoram State 9 Ball Pool Championship 2024 - 2025 ah Lalrina Renthlei a champion

Aizawl | March 29, 2025: Mizoram Snooker & Billiards Association (MSBA) buatsaih Mizoram State 9 Ball Pool Championship 2024 - 2025 chu vawiin tlai khan MSBA Hall, Hawla Indoor Stadium-ah final khelh niin, a hmawr bawk a ni a, Lalrina Renthlei a champion.

Mizoram State 9 Ball Pool Championship 2024 - 2025 Final-ah hian Lalrina Renthlei, Tuikhuahtlang leh Zonuntluanga (Tekawka), Electric Veng te an inhmachhawn a. Race to 9 a khelh niin, an inhneh tawk hle a, match hmuhnawm tak an entir a. Frame an inlak chhawk zak zak hnu-ah 8 - 8 niin, deciding an khel a, a tawpah Lalrina Renthlei-in frame a la a, 9 - 8 a chakin a champion ta a ni.

Mizoram Snooker & Billiards Association (MSBA) buatsaih Mizoram State 9 Ball Pool Championship 2024 - 2025 ah hian Mizoram hmun hrang hrang atangin player 75 an tel a, Aizawl bakah Lunglei atangin player pahnih, Champhai atangin pahnih leh Seling atangin player 11 bakah Sihphir atangin eng emaw zat an tel bawk a ni.

Mizoram State 9 Ball Pool Championship 2024 - 2025 hi MSBA Hall, Hawla Indoor Stadium, Republic Vengthlang, Aizawl-ah March 24 atang khan khelh niin,nimin khan Quarter finals leh semi finals khelh a ni a, vawiin-ah final khelh a ni ta a ni.

Pool khel duh leh a tuite tan MSBA Hall-ah hian, Pathianni tih loh nitin chawhnu dar 2 atanga zan dar 10 thleng cheng 100 chauh chawiin a inkhelh theih reng a ni.

Mizoram State 9 Ball Pool Championship 2024 - 2025 hi youtube-ah Explore Mizoram channel-ah live a pekchhuah thin a ni.

Quarter Finals hi nimin tlai dar 5 khan khelh a ni a, Zonuntluanga'n Lalbiaksanga a hneh a, PB Liansangzuala'n T Laltlansanga hnehin Semi final a inhlangkai a, Lalrina Renthlei-in Lalrinawma a hneh a, Lalsangzela leh Peter Lalrintluanga inkhel-ah Lalsangzela'n semi final a inhlangkai bawk a ni.

Semi Final hi nizan dar 8 khan khelh a ni a, Zonuntluanga vs Lalsangzela inhmachhawnin, Zonuntluanga a chak a, Lalrina Renthlei vs PB Liansangzuala inhmachhawnin, Lalrina a chak bawk a ni.