MZP-in ATL road dang ṭan; ATL sum dah kir an phut

Aizawl | April 28, 2025: Mizo Zirlai Pawl (MZP) Headquarters, Lunglei chuan tukin dar 7 aṭang khan Aizawl - Thenzawl - Lunglei Road (ATL Road) chu Pukpui-ah an dang ṭan.

Vawiin ni 28 April (Thawhṭan ni), 2025 tukin dar 7:00 aṭang khan MZP Hqrs.:Lunglei chuan ATL road sum pawh pen duh loh lantirna Road Block Pukpui ṭawngṭaina hmunah neiin, Pu Lalfakzuala Treasurer kaihruaina hnuaiah hun tawi hman a ni.

He hunah hian pawl hrang hrang- MSU, Chhimbial Chhantu, Maxicab Owner's Assiociation (Lunglei to Aizawl/ Aizawl to Lunglei) leh ZDU Sub-Hqrs Lunglei te'n an pawl aiawh ṭheuha thusawiin, Lunglei mipuiin kawng ṭha an mamawh tawh zia leh ATL road sum pawh pen an duh loh zia an tarlang a. Sawrkar in a rang lama an sum hmuh tawh sa lo dah kir tur leh Lunglei mipuite ṭanrual hun a nih zia an sawi a ni.

MZP Hqrs.: Lunglei President Johan Hmangaihzuala Ralte chuan thusawiin, pawl hrang hrangte'n an thlawp tlat avangin lawmthu a sawi a, ṭangrual zel turin thu a chah a, a tawp thlenga hma an lak tur thu sawiin, Lunglei mipuiten thlawp tlat turin mipuite a ngen bawk a ni.

Secretary K Lalchhuanawma (Spokeperson) chuan report leh resolution pass na hun hmangin resolution ah, "ATL road siamna tur sum vaibelchhia 90.69 aṭanga an pawh pen vaibelchhia 44.89 hi dah let ni se, a daih loh chin zawng siamna tur pawh hi written assurance awm rawh se," tiin kalkawmte chuan ban dinglam phar in he resolution hi an pass tlang a ni.

MZP Hqrs. Lunglei chuan 'Social Media' a thu leng vel ring mai lo a, tualchhung media te ring zawk turin mipuite a ngen a. Mipuite nena thawkho-a, ṭangrual zel turin a ngen bawk a ni.

MZP Lunglei hian, thuchhuah siamin sorkar hi ni 15 chhung hun an lo pe tawh a. An hun tiam a ral hnuah pawh sorkar aṭanga thu lawmawm an dawn tak loh vangin kawng hi an dang ta a ni.