Aizawl | April 9, 2025: Meitei te kuttawrh vanga rei tak Delhi-a inenkawl tawh Manipur-a Mizo MLA, Adviser to CM ni bawk Vungzagin Valte chu vawiin chhun dar 1:30 khan Lengpui Airport-ah MSU General Headquarters chuan an lo hmuak a ni.
He hunah hian Manipur MLA Vungzagin Valte chuan, Mizo mipuite hnena lawmthu sawi duh vangin Mizoram lo tlawh hmasa a nih thu a sawi.
Manipura Zofate leh Meitei te inkara buaina a intan ni (May 3) tuk - May 4, 2023 khan Thanlon bialtu MLA Vungzagin Valte chuan, a ina Mizo mipui tlan khawmte him taka an chhuah theih nan khatih hunlaia Chief Minister N Biren Singh chu a chennaah a va hmu a, chumi haw lam chu mipui thinrim inhawrkhawmin an lo bei a, thichhawnga letin, an kalsan a, hun rei tak Delhi-ah enkawl a nih hnuin vawiin khan Mizoram a rawn lut ta a ni.
Vungzagin chuan, Biren Sing chuan Mizo te a hmuhsit thu leh, Mizo te do zawnga a chet thu a sawi a. A natna avanga hun harsa tak tawka a inenkawl lai khan Manipur Sorkar emaw Assembly atangin tanpui beitham tak chauh a dawn thu a sawi bawk.
Vungzagin chuan, amah lo hmuaktu MSU, SSPP leh Mizoram mipuite chungah lawmthu a sawi tak meuh meuh a, kan hmaa chona awm hmachhawn turin Zofate kan tanrual a tul thu a sawi bawk.
A hriselna atan leh a him zawk nan, Lengpui atang hian helicopter in manipur a thlawk lut dawn a ni.
He hmuahna hun hi MSU General Headquarters Vice President Roluahpuia'n kaihhruaiin, Adviser to CM (Technical) H Ginzalala'n thu a sawi.
Laltea chuan hetiang hmuahna program bultumtu MSU te chungah lawmthu a sawi a. He Zohnahthlak te tawrhna hi nakina Zofate min la suihkhawmtu leh, tawrhna lawmawm anih ngei a beisei a ni. Pu Vungzagin te chhungkua pawh a tawrhpui zia leh he tawrhna hi tawrhna malsawm leh lawmawm zofate tan a ni dawn tih an thinlung ah vawng tlat se a duh bawk a ni.
Ginzalala chuan hetiang a ropui taka min lo hmuaktu MSU te chungah leh Hnam Pual hruaitute chungah lawmthu a sawi tak zet zet a, Delhi atanga Manipur direct lova Aizawl ka rawn luh hmasak chhan chu Mizoram sawrkar leh mipuite chungah lawmthu sawi ka duh vang a ni a ti bawk.
MSU chuan Manipur-a kan unau Zofaten chhantu kan Zohnahthlakpui MLA huaisen tak an nei hi kan chhuang hle a, dam leh hrisel taka an in leh lote an thlen theih nan duhsakna kan hlan bawk. MSU chuan mahni ram hruaitu rawng taka kutthlaktu meitei te chu a dem takzet a, hetiang thil hi thleng nawn tawhlo se kan duh takzet a ni.
Vungzagin Valte dam taka Mizoram alo thleng leh lawmna atan hian Dr. H&TE Minister Vanlalthlana pawhin thilpek a hlan ve bawk a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: