Lengpui Airport venhim hna CISF kutah hlan fel ta!

Aizawl | April 24, 2025: Lengpui Airport venhim hna chu vawiin khan Mizoram DGP Anil Shukla chuan CISF (Central Industrial Security Force) kutah a hlan. Kum 1999 atang khan Lengpui Airport venhim hna hi Mizoram State Police leh Central Reserve Police Force (CRPF) te’n an lo kalpui char char a ni.

Lengpui Airport security hna inhlan chhawnna pual hian inkhawm tawi buatsaih niin, khuallian DGP Pu Anil Shukla chuan CISF te’n hna tha tak an thawh theih a duhsak thu sawiin, Mizoram chu ram dang pahnih nen a ramri intawm a nih avangin dan phalloh thil tawlhruk a tam thu te sawiin, hemi kawngah hian Airport lama duty te pawh an fimkhur viau thin a tul thu a sawi a ni.

He huna hian Pu Vijay Prakash, IG CISF/APS-I HQr, New Delhi leh Pu Deepak Verma, DIG AP (E&NE) HQr, Kolkata te’n thu an sawi bawk a. Lengpui Airport chu a hmangtu passenger an lo tam belh zel avangin leh, sorkar laipuiin ram puma civil aviation facility te venhimna tihchangtlun zawk a duhna nen inrem taka CISF hi Lengpui Airport a dah a nih thu sawiin, airport venhim hna thawh kawnga CISF in tawnhriat thuk tak a neih thu leh Lengpui Airport ah pawh thataka an thawh ngei tur thu te an sawi bawk.

Tunah hian Lengpui Airport ah CISF personnel 121 an duty dawn a ni.

Programme ah hian Mizoram Police SP Security C Lalzahngoa, SIB Joint Dy. Director Rohan Botre, Airport Director Saidenga, CISF Commandant Pranav Kumar, CISF Dy. Commandant Harish Singh Nayal, Airport Wing (GAD), CRPF, I&PR Airport Authority of India, Indigo, Alliance Air, IOC, BPCL, AIASL, AIESL, MET atangin aiawhte an tel a. Aviation Director Lalrohlua chuan lawmthu sawiin hun a khar a ni.