ISUA RINNA PUANCHHUAH DAN

_Hmangaihna Thumal Ropui Pasarih_

By Rick Warren 

— April 09, 2025

“Pathian felna, Isua Krista rin avanga a ring apiangte hnena tihlana awm chu a ni.” Rom 3:22

Bible chuan, “Chu miah chuan rin lehzual nan, rinnain Pathian felzia chu a lo lang a, “Mi fel chu rinnain a dam ang,” tia ziak ang khan. (Rom 1:17).

Pathian Thu chuan, “Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” (Ephesi 2:8-9).

Chanchin Ṭha chu, Isua thihna leh thawhlehna avangin Pathian kan be pawp thei ta hi a ni. Fapa Isua Krista avang chauhin vanram kan lut thei a ni.

Krista i rinna chu engtin nge i puan ang? Bible aṭangin mawltein i thlir ang:

*Chhandamtu i mamawh tih inpawm rawh.*

Mahni maiin Pathian hnen kan thleng thei lo. Misual kan ni vek si a. ’Hrem hmabak vek kan ni. Vanram chu a famkima, keini chu kan ni ve si lo. Nimahsela Bible chuan, “Kan sualte thupha kan chawi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni.” (1 Johana 1:9).

Tirhkoh Paula chuan, “Pathian kan rin chuan—Pathian felna, Isua Krista rin avanga a ring apiangte hnena tihlana awm chu a ni.” (Rom 3:22).

*Isua ring rawh.*

Bible chuan, “Lalpa Isua ringla tichuan chhandamin i awm ang” (Tirhkohte 16:31). Chumi awmzia chu Bible in a sawi rin tur chu Isua hi a ni, ani chu i rin chuan i hmalam hun atan leh i engkim atan a ṭangkai ang.

Isuan, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.” (Johana 14:6).

Kristaah chuan i insawrbing tur a ni: “I kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang,” tih hi. Miten thinlungin an ring a, felna an hmu thin a; kain an tan a, chhandamna an hmu bawk thin a ni.” (Rom 10:9-10).

*Isuaa i inpekna chu puang rawh.*

Isua i ring a ni tih i nun hmangin hrilh rawh. Amah leh a thutiamte chu i ring a ni tih puang rawh. Isuan, “Tupawh mi ring chu kei mi ring a ni lo, mi tirtu ring a ni zawk e. Tupawh mi hmu chu mi tirtu hmu a ni. Entua khawvela lo kal ka nih hi, tupawh mi ring apiang thima an awm reng loh nan.” (Johana 12:44-46).

*Pathian thutiamah innghat rawh.*

Johana 3:16 - a Pathian thutiamah hian innghat rawh: “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."

*Kristaa inpekna nei turin ṭawngṭai rawh.*

Isua ila ringlo anih chuan, engvangin nge i la nghah cheu? Hetiang hian ṭawngṭai rawh:

“Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

Ngaihtuah zui atan

* Isua rinna puandan kan zir a, kan zir aṭang khian ke pen lohna engnge i la neih? Chu chuan engtin nge a dal che? Vawiinah hian hma la turin i inpeih em?

* Pathian thutiam i hriat theihnan eng Bible chang hi nge i vawn theih ang?

* Chhandamtu hrelo i hmelhriat te zingah an la awm em? Biak dan ngaihtuah la, he devotion thu pawh hi thehdarh dan ngaihtuah ang che.

*[Lettu: Sangpuia]*