YMA rorelna sangin "Raltlante awmna tur, enkawl dan tur leh kaihhruaina mumal tak Sawrkar-in siamin, khauh takin kengkawh zui rawh se," tih chu nasa zawka hmalak an rel

Aizawl | April 9, 2025: YMA Rorelna sang Central Co-ordination Committee (CCC) vawi 102 chu vawiin khan Central YMA Hall, Tuikhuahtlang Aizawlah neih a ni.

He hun hi Central YMA President Lalhmachhuana chuan kaihruaiin Vice President Prof Lalnuntluanga'n hunserh a hmang a, Gen.Secretary Prof. Malsawmliana hnen atangin inhmelhriattirna leh hmalakna hrang hrang report ngaihthlak a ni.

He hunah hian YMA Rorelna inkhawmpui Ni 24.10.2024 a neih zawh taka Rorel hrang hrangte bawhzui a nih dan leh hmalak zel dan turte ngaihtuah a ni.

A. YMA KHAWIH :

1. Faina leh thianghlimna kawnga hma kan sawn theih nan bawlhhlawh paih dan inzirtirna neih ni rawh se tih chu hmalakna kal mek inhrilhfiah a sawi ho anih hnu in a tul anga hmalak chhunzawm zel nise kan ti.

2. Plastic bur/bottle-in kan ram a tihchhiat nasat avangin, a hman tlem dan inzirtir leh thil danga hman tangkai dan kawng zawn ni rawh se tih chu hmalakna kal mek inhrilhfiah a sawi ho anih hnu in plastic bur / bottle hmantlemna kawngah uar zawkin hmalakna kalpui zel nise, a hman tangkai dan tur chuangchangah pawh tul anga hmalak chhunzawm zel nise kan ti.

3. Kumtin a Furpui a lo thlen dawnin hemi ken tel chhiatna hrang hrang laka lo inven lawkna turin ‘Fimkhurna Hapta/Thla’ ram pumah hman thin ni rawh se tih chu hmalakna kal mek inhrilhfiah a niin kumin April thla hi fimkhurna thla atana hman mek a niin hei hi Sub.Hqrs, Group leh Branch ten mahni huam chhung theuh uluk leh fimkhur taka hman nise kan ti.

4. Mizoram chhunga kawngpui kan neih te hi a vil kawngah YMA-in hma la rawh se tih chu hemi kawngah hmala tura Monitoring Team / Committee din anih thu leh Monitoring Committee hmalakna hrang hrangte ngaihthlak a niin kan ramah kawngpui tha kan neih theih nan nasa zawka hmalakna kalpui zel nise kan ti.

5. Ruihhlo Do kawngah YMA-in tun aia chak zawkin hma la rawh se tih chu hemi kawnga hmalakna kal mek te inhrilhfiah a sawiho a niin hemi kawnga hian chak leh zuala hmalak zel nise kan ti.

6. Mizo tawng humhalh kawnga YMA hmalak mekna hi chak zawka kalpui ni rawh se tih chu hmalakna kal mek inhrilhfiah a niin chak leh zuala hmalak nise kan ti.

7. YMA Inkhawmpui Lian neih loh kumah Sub-Hqrs. YMA Inkhawmpui neih ni rawh se tih chu Sub.Hqrs hruaitu term laklawhte chu pawhsei nise, Sub.Hqrs hnuaia Group inkhawmpui leh Rorel inkhawm siam rem chu Sub.Hqrs kutah dah a ni.

8. Company / Corporate ten Mizoram chhungah CSR tam zawk an hman theih nan Central YMA-in hma la rawh se tih chu hemi zirchiang tu tur Central YMA in Committee a din te hmalakna te inhrilhfiah a niin a tul anga hmalak chhunzawm zel nise kan ti.

B. SAWRKAR KHAWIH :

1. Mizorama raltlante awmna hmun tur, enkawl dan tur leh kaihhruaina mumal tak Sawrkar-in siamin, khauh takin kengkawh zui rawh se tih chu hemi kawnga ruahmanna lo siam tu tur Central YMA in Committee a din te hmalakna thlir in hemi kawngah hian nasa zawka hmalak zel nise kan ti.

2. Mizoram Lokayukta hian thubuai chhuitu tur Investigation Agency hranpa a neih theih nan hmalak ni rawh se tih chu hemi kawnga hmala tu tur a Central YMA in Committee a din te hmalakna kal mek inhrilhfiah a niin a tul anga hmalak chhunzawm zel nise kan ti.

3. Tunlai a School thenkhatin Pawl 4 thlenga Mizo subject an la zir mumal lo hi Sawrkar-in hma la rawh se tih chu hmalakna awm mek te inhrilhfiah niin a tul anga hmalak zel nise kan ti.

4. Mizoram Education (Establishment & Management of Private School) Rules hrang hrang te (Elementary - Higher Secondary School) hi a tul anga siam tha-in, ennawn ni rawh se tih chu hmalakna kal mek inhrilhfiah a niin a tul anga hmalak zel nise kan ti.

Vawiin CCC Meeting-ah hian Rorel palai mi 222 an kal a ni.