Aizawl | April 9, 2025: Hawng 440 vangin dinthar ṭhalai an pungkhawm a, YMA-in veng chhung aṭangin chhiatni ṭhatni-ah an en san dawn niin thu dawn a ni.
YMA Dinthar Branch chuan, nizan khan meeting an nei a, nizan la la khan, ṭhalai pungkhawmte awm laiin, membership fee leh chhiatni fund an pe let a, veng chhung aṭangin chhiat ṭhatah an en san dawn niin thu dawn a ni.
Nizan zan rei hnuah Dinthar ṭhalai rualte hi Ruihhlo hawng 440 kaihhnawia man Henry Lalbiakzinga te in kawtah an pungkhawm a, "hawng 440 kan duh lo!," tih te leh, "ruihhlo zuar kan venga awm turin kan duh lo!" tih ten an au a ni.
Ṭhalaite zingah hian, "a aia tlem zawk pawh in dim lova," tia au pawh an awm a, pungkhawm an ṭhahnem hle a ni.
A hmunah hian Police lam an thleng nghal a, chhiatna thleng a awm lo.
Dinthar veng chhunga all NGO meetingin an chungthu hi an la rel zui dawn niin thu dawn a ni a, an meeting hun tur erawh an la sawi thei lo.
Hetihlai hian, Central YMA chuan nimin khan thuchhuah siamin March ni 15-a Mizoram Police in Ruihhlo thahnem tak Hawng 440 lai leh inhnamhnawiha puh Henry Lalbiakzinga Chhundeng, Dinthar, Aizawl ami leh a thurualpuite an man chu lawmawm an tih thu an sawi a. An phu tawk anga dan hmanga hremna an chunga lek ngei anih thueih nan Central YMA chuan a thlir zui reng dawn an ti.
Central YMA thuchhuah tarlan danin thalai tam tak ruihhlo bawiha an tan mek laia Ruihhlo hmanga sumdawnna kalpui ani chu an haw takzet an ti a, Henry Lalbiakzinga Chhundeng leh a thurualpuite chu an phu tawk anga dan hmanga hremna an chunga lek ngei anih thueih nan Central YMA chuan a thlir zui reng dawn a ti a, hemi kaihhawiha Kulikawn Branch YMA leh Ramhlun North Branch YMA te hmalakna chu an thlawp tih an sawi bawk.
Central YMA chuan ruihhlo hluar zel tur ven nan theihtawp an chhuah tih sawiin Central Anti Drugs Squad (CADS) an din thar leh an ti a, hmun hrang hranga YMA ten mahni huamchhungah tha thlah lova theihtawp chhuah zel turin an chah tih an sawi bawk.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: