Aizawl |March 15, 2025: YMA Village Profile Apps chu Nilaini March 12, chawhnu dar 2:00 khan Central YMA Committee Room-ah tlangzarhna hun hman a ni a, Central YMA President Lalhmachhuana'n a tlangzarh. Tlangzarhna hun hi CYMA Assistant Secretary Fabian Lalfakawma'n a kaihruai.
Central YMA President Lalhmachhuana chuan thu sawiin YMA chuan tunlai khawvel thang chho zelah YMA te pawh hma kan sawn chho zel a. YMA member mai ni lo, vengchhung/khaw chhunga mihring chengte dinhmun kimchang dah khawmna tur Village Profile kan nei thei ta hi a lawmawm tak zet a ni. YMA in bung thar a kai dawn niin a lang a, Branch YMA ten veng mipui chhinchhiah a kumtin an ziah thar thin chu a ngai tawh dawn lo a YMA-in hmasawnna kawng a zawh zel chu lawmawm a tih thu a sawi bawk.
CYMA Gen Secy Prof. Malsawmliana chuan Report a pe a. He Village Profile Apps hi Lailen Consulting Private Ltd siam a nih thu leh Mizoram Sawrkar nen tang tlang a siam a nih thu sawiin hei hi YMA mai bakah Sawrkar tana Data tangkai tak a la nih tur thu a sawi. Village Profile siamna atan hian Home Department atangin Rs. Nuai 10 dawn a ni a, hei hian a siamna mai bakah kum engemaw chen a enkawl zui zelna tur a daih dawn a, Home Department chungah Central YMA in lawmthu a sawi a ni.
Village Profile App hi Aizawl City Branch 6 ah hman chhin phawt tura ruahman a ni a, a siamtu Lailen Consulting Pvt. Ltd atangin inhrilhfiahna hun hman a ni bawk. CYMA Finance Secretary MS Ralte in lawmthu a sawi.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: