Treasury Bazar chungchangah AMC-in Venghlui LC te 'Local Council ban theihna dan' tlawhchhana hmalak theih a nih thu an hriattir

Aizawl | March 25, 2025: Treasury Bazar hlui luah luih tum leh chungchangah Aizawl Municipal Corporation (AMC) -in Venghlui Local Council chu, State Sawrkar leh AMC duhdana Treasury Bazar khar a nih theih nan hma lo la turin a hriattir a.

AMC chuan, "Aizawl hmasawnna tura State Sawrkar leh AMC hmalakna dodal leh tithuanawp zawnga chetlakna a awm chuan Rule No. 24 of the Mizoram Municipalities (Ward Committee and Local Council) Rules, 2010 hmangin hma lak theih a ni ang." tiin Venghlui Local Council hi an hriattir bawk.

He an dan tarlan-ah hian, 'Dissolution of Local Council' a ni a, AMC hian Venghlui LC hi banah an vau a tih theih awm e!

24. Dissolution of Local Council - 

(1) The Municipality, for good and sufficient reasons, to be recorded in writing and after discreet inquiry by a duly authorised and responsible officer, may order dissolution of any Local Council. 

(2) In the event of such dissolution, the Municipality may appoint a prominent person of the locality to be designated as Administrator to take over the charge of the Local Council till such time fresh election is held: 

Provided that in the event of such dissolution, a fresh election shall be held within sixty days from the date of dissolution of the Local Council.

"Vengchhung mipui zinga dan kalha hma late hi lo khap a, bazar siamthat hi a rang thei ang bera titawp a, luahluih tir lo turin an hriattir a. An hmalakna hi 26 March, 2025 tlai dar 4 ral hmain AMC-ah ziaka thehlut tur an hriattir bawk.

AMC chuan, "Report kan dawn danin, Treasury Bazar hlui area, Venghlui huamchhungah tukin zing dar 7:00 vel khan Venghlui mipui pungkhawmin Gate tichhiain, kangmeiin a tihchhiat bazar seat an siam tha a. Helai hmun hi kan hriat angin, Speaker, Mizoram Legislative Assembly rawtna leh State Sawrkar leh AMC duhdan angin, kawng kama dan kalha bazar siam hi tihtawp a ni a. Vendor te hi AMC Multi - Complex, Tuikual Southah sawn thlak vek tur a ni." an ti a.

"Hemi chungchangah hian AMC pawhin Order No.F.11014/2/2025-AMC dt. 17.03.2025 a chhuah a ni. Tin, Chairperson, Aizawl District Disaster Management Authority & Deputy Commissioner, Aizawl District in No.C.16011/138/2024-DC(A)(DMR) dt. 18.03.2025 hmanga helai hmun hi hung tura AMC hriattir kan nih angin hung a ni a."

"He order hi sut a la nih loh avangin helai hmunah hian luh leh chhuah phal a ni lo. AMC chuan hetiang thupek a awm lai reng leh bazar insawn kalpui a nih mek laia hetiang hmalakna duhawm lo tak a thleng hi pawi a ti hle." tiin Venghlui LC hi lehkha an thawn a ni.

AIZAWL MUNICIPAL CORPORATION

Thuampui, Aizawl - 796017: Mizoram 

No.F.11014/2/2025-AMC Dated Aizawl, the 25th, March, 2025

To, 

The Chairman,

Venghlui Local Council.

Subject: Treasury Bazar chungchang.

 

Ka Pu, 

Report kan dawn danin, Treasury Bazar hlui area, Venghlui huamchhungah tukin zing dar 7:00 vel khan Venghlui mipui pungkhawmin Gate tichhiain, kangmeiin a tihchhiat bazar seat an siam tha a. Helai hmun hi kan hriat angin, Speaker, Mizoram Legislative Assembly rawtna leh State Sawrkar leh AMC duhdan angin, kawng kama dan kalha bazar siam hi tihtawp a ni a. Vendor te hi AMC Multi - Complex, Tuikual Southah sawn thlak vek tur a ni.

Hemi chungchangah hian AMC pawhin Order No.F.11014/2/2025-AMC dt. 17.03.2025 a chhuah a ni. Tin, Chairperson, Aizawl District Disaster Management Authority & Deputy Commissioner, Aizawl District in No.C.16011/138/2024-DC(A)(DMR) dt. 18.03.2025 hmanga helai hmun hi hung tura AMC hriattir kan nih angin hung a ni a. 

He order hi sut a la nih loh avangin helai hmunah hian luh leh chhuah phal a ni lo. AMC chuan hetiang thupek a awm lai reng leh bazar insawn kalpui a nih mek laia hetiang hmalakna duhawm lo tak a thleng hi pawi a ti hle.

Chuvangin, State Sawrkar leh AMC duhdana Treasury Bazar khar a nih theih nan hma lo la tura ngen leh hriattir i ni a. Vengchhung mipui zinga dan kalha hma late hi lo khap a, bazar siamthat hi a rang thei ang bera titawp a, luahluih tir lo turin kan hriattir che a ni. In hmalakna hi 26 March, 2025 tlai dar 4 ral hmain AMC-ah ziaka rawn thehluh tur a ni.

Aizawl hmasawnna tura State Sawrkar leh AMC hmalakna dodal leh tithuanawp zawnga chetlakna a awm chuan Rule No. 24 of the Mizoram Municipalities (Ward Committee and Local Council) Rules, 2010 hmangin hma lak theih a ni ang.

Enclosure: 1. No.C.16011/ 138/ 2024-DCMDMR)dt. 18.03.2025 2. No.F.11014/2/ 2025-AMC dt. 17.03.2025

I rintlak,

Sd/-

JOSEPH H LALRAMSANGA

Municipal Commissioner, Aizawl Municipal Corporation.