MIDANG ṬANPUI HI NATNA AṬANGA DAMNA A NI

_Hmangaihna Thumal Ropui Pasarih_

- Rick Warren

- March 26, 2025

“Chutichuan Kristan tisaa a tuar avangin nangni pawh chutiang rilruknain inthuam ve rawh u; tisaa tuar tawh chuan sual a bansan tawh si a.” 1 Petera 4:1

I nat hian tu nge i ngaihtuah nasat ber? Nangmah!

Nangmah i inngaihtuah kha i mawh lo ve - mihring i ni miau si a. I nat chuan thlamuantu i mamawh a. I damloh chuan, ngaihsaktu i mamawh a. I lungngaihin, ngaihventu i zawng a ni. Natna chuan mahni a inngaihtuahtir ber che a ni.

Mahse Pathian chuan, amah anga midang hmangaih zir tur chuan, i nat pawhin, midang nat dan hmu thiam turin a duh che a ni.

Isua chu kan entawn tur ropui ber a ni. Krawsa khaikan anih khan, taksa, rilru leh thlarau ah a na a ni. Khawvel sualna zawng zawng a phur a. Nimahsela a thih dawn darkarah khan, midang tawrhna kha a zuk ngaihtuah tel tlat a ni.  

 

Isua chu hetiang hian a tawngtai a, “Ka Pa, anni hi ngaidam rawh; an thiltih hi an hre lo a nih hi,” a ti a. (Luka 23:34). A bulah mi hnenah chuan, “Vawiinah hian ka hnenah paradis-ah i awm ve ang,” a ti a. (Luka 23:43). A nu ngei pawh a la ngaihsak em em a. Hrehawm taka a awm lai pawhin, amah chauh a inngaihtuah lo a ni.  

Pathian Thu chuan Isua rilru in put ve a ngai a ti a ni (Philippi 2:5). Chumi awmzia chu, natna i tawrh pawhin, tute nge natna tuar ve tia hawi zau turin a duh che a ni. Nangmah i inngaihtuah anih pawhin, midang pawh i ngaihtuah tel ve tur a ni.

Chu tak chu a harsa lai a ni. I nat mek lai khan midang natna kha engtin nge i hmuh ve? 

Bible chuan, “Chutichuan Kristan tisaa a tuar avangin nangni pawh chutiang rilruknain inthuam ve rawh u; tisaa tuar tawh chuan sual a bansan tawh si a.” 1 Petera 4:1

Pathian khawngaihna avangin, i tawrhna chu i enkan thei ang. Chutianga i tih chuan sualna kalsanin Isua i ang telh telh ang.

Hei hi kan chhungkua ah pawh a dik a ni. Pathian khawngaihna avangin kan nat lai reng pawhin, midang natna tuar ve te chu kan tanpui thei thin a ni. Chuvangin Pathian kan natnaah te hian awmzia a neihtir thin a, midang kan tanpui theihna tur zawkin min nattir thin a lo ni.

Pathian chuan i natna tawrh pawh, midang  tuar ve te tan a hmang tangkai thei a ni.

Ngaihtuah zui atan

* I natna tawrh tawhah khan eng kha nge midang natna tuar ve te tan a hman tangkai i rin?

* Nangmah i intanpuina kawngah engtin nge midang tanpui turin tangkai takin i thawh theih ang?

* Midang tanpui chu damna a ni tih hi engvangin nge i ngaihtuah?

*[Lettu: Sangpuia]*