"Kan phak bakin kan nung tih a chianhg; sum puk a tam ber kum a ni bawk,"

Aizawl | March 21, 2025: Vawiin hian Mizo Hnam Runah chhung inkhawm neih a ni a, Prof. James LT Thanga, Department of Economics MZU chuan thu a sawi a. "Tunhnai kum 10 liam ta enletin Covid nasat kum tih lohah chuan kum 2024 - 2025 chhunga kan Revenue Deficit en hian kan phak bakin kan nung tih a lang chiang hle a ni. Hei bakah hian kum 2024 - 2025 hi kum 10 chhung en letin Mizoram sorkar-in sum a puk tam ber kum a ni bawk a ni," a ti.

Prof. James LT Thanga chuan, "Mizoram sorkar budget kalphung enin eng ber nge an ngaih pawimawh ber, prirority an pek tih a hriat loh. Mipuite rawng kan bawlna turah e'nge sorkar hian a dah pawimawh ber a hriat loh hi a pawi hle a ni. " a ti a. "Sorkar-in budget a pharh tawh ṭum 2-ah hian kan leiba vaibelchhe 2000 chuangin a punbelh tih kan hmu thei bawk a ni," a ti.

MZU mithiam chuan, "Mipui hian kan ram sum leh pai dinhmun dik tak hi hria se ka duh a, zirtirna dik dawng se ka duh bawk a ni. Mipuiin an hriat thiam ve phak chiah loh hmanga insawi ropui a, an rilru suk thlek dik lo puttir tumte pawh awm thei a ni. Kan ram sum leh pai chungchanga zirtirna pe tur hian ka inpeih reng a ni," a ti a. "Democracy ramah party-te hi an pawimawh a, hnawl mai lovin siamṭhat kan tum tur a ni," tiin mipuite a chah bawk.

Prof. James-a chuan, zalen taka mipuiin social media hmanga ngaihdan kan sawi ṭhin chu hlu a tih thu leh lawmawm a tih thu a sawi a. "Mipuite thusawi hi sorkar pawhin a bengkhawn tur a ni. Tin, kan ram sum leh pai dinhmun leh budget-te hi hriatthiam kan tum ve tur a ni. Kan ram budget-te hi hnatlang rorel a, rel mai mai tur a ni lo," a ti a. "GSDP hi Mizoram sorkar-in amaha a teh ngawt theih a ni lo. State dang nena inthlunzawm tam tak a awm a, chutia Mizoram bila lo teh ve ngawt theih a ni lo. Kalphung fel tak neia teh tur a ni," a ti bawk.

He inkhawm hi Pu Lalpianfela Chawngthu, General Secretary-in a kaihruai a ni.