Emirates Stadium-ah 'Chibai' Mizoram Arsenal banner tar

Aizawl | March 20, 2025: Mizoram Arsenal Supporters' Club hma lakna-in Emirates Stadium chhungah Mizoram Arsenal banner tar a ni ta.

Mizoram banner hi nikum October thla aṭang khan buaipui ṭan niin banner design hi MASC Financial Secretary Amnon VL Thlengkima kutchhuak a ni a. Arsenal hotute nen inbe rawn chungin banner-ah hian Mizo ṭawng thumal 'Chibai' tih leh Mizo puan 'Tawlh Loh Puan' chu zeh tel a ni a, banner len zawng leh thil ṭul dangte tih fel a nih hnuah London lama MASC mi leh sate'n Arsenal club thawhpui banner siamna hmunpuiah siamtirin, Emirates Stadium chhak lama ṭhutna East Stand Upper Tier an tih, a langsar lai takah tar chhuah a lo ni ta a ni. 

MASC hian 2023 kum tir lam khan Emirates Stadium chei ṭhatnaa stadium chelh dingtu banpui lian 'Core' an tih pawn lama supporter club-te banner tarna tur an siamah MASC Banner hi a lo tar tawh bawk a ni. 

MASC chuan Emirates Stadium chhungah ngei Mizoram banner pho lan a ni ve ta hi a lawmawm a tiin a ngai hlu hle a. MASC a din theih nan leh MASC thil tum a hlawhtlin theihna atana tha leh zung lo seng tawhte, member lo ni tawh ṭhinte leh member ni lai mekte, MASC hma lakna thlawp tlattu Mizorama Arsenal ṭantu zawng zawngte chungah MASC chuan lawm thu a sawi tak meuh meuh a ni.

.