Aizawl | March 19, 2025: Ex MNA te buatsaih Kawmzawl Ambush hlawhtlinna hriatrengna monument chu vawiin chawhma khan Pukpui-ah MNF President Zoramthanga chuan a hawng.
Sawrkarna kan chelh lai a, Assam nen ramri a kan sipaite an in kah tum khan, Union Home Minister Amit Shah chuan ramri a kan sipai awm te la let turin thinrim takin min rawn bia a. Ka chhanna chu, ka sipaite ka withdraw-na in hmu in ka banna in hmuh hmasak ka ring tiin ka chhang a. December 16, 1971 kha India sawrkar tan ni chhinchhiah tlak hnehna ni Vijay Diwas(Victory day) a nih laiin Mizo Hnam tan chuan Exodus day a ni si. Mizo Nationalism humhim tur a thisen a baptist, underground te chiah hian he Hnam thuthlung hi an keng lova, Ramhnuaia rammu ve lo nunaute, kan vaiin Mizo zawng zawng ten hen Hnam humhimna tur a man kan pek hi a tam em em a. Mipuite hlei hlei kha a tuartu an ni a. Fahrah, Hmelthai, Rualbanlo, nunna chan tam tak an awm a. Chu a man kan pek chuan Mizo Nationalism hi a humhim a ni. Thisen seng a, nunna tam tak luanralna, Mizo Hnam tan a, a man kan pek zozai, harsatna zozai avang hian Mizo Hnam tan a tlanchhiat ai chuan Chief Minister dinhmun kalsan kha pawi tihna ka nei lo, Pu Zoramthanga President MNF chuan a ti.
Ex MNA te buatsaih Kawmzawl Ambush hlawhtlinna hriatrengna monument hawn chu vawiin dar 11:00am khan Pukpui-ah Pu Zoramthanga President MNF chuan a nei.
Pu Rama chuan, MNF movement, Hnam thinlung putna leh Mizoram tan a theih tawp kan chhuahah khan Burma a kan unaute, Manipur leh East Pakistan, Assam leh Shillong a Zofa zawng zawngte khan an tuar vek a. Chu chuan Hnam anga chimral kan nih lohna pawh hi a ni India Hmarchhak hi han en ila, Shillong, Manipur a dawrkai lian zawng zawng hi vai dawr a ni. Mizoram erawh a ni lo, heng zawng zawng hi Pathian Mizo mipuiten a man tam tak an pek vang a ni. Thangtharten an hriat reng tur chu Hei leh chen hi Lalpan min awmpui a. Jehovah hian Hnam tam tak hnen a chanchintha hril turin Mizo Hnam hi a humhim a. MNF hi a ral mai mai dawn lo, thawhchhuah lehni a nei dawn a. Thisen tam tak chhuak a, Hnam thuthlung kan lo tihnghetna hi Pathianin min hriatpui a, malsawmna in min la vur leh dawn a ni tih hi an hriat a, an ngaihtuah a, an chhiar ve a ngai. Vawiin a kan hawn tak Monument hian Hnam Pasalthate tumruhna, taimakna, huaisenna, Hnam thinlung an putna, vai sipaite laka ram tan a hnehna an chan dan min hriat thar tirtu lo ni se, a ti
Monument hawnna inkhawm tawi Pukpui khawchhung a neih hi Pu Vanlalhmuaka President Ex MNA Southern Hqrs Lunglei chuan a kai hruai a. LMC Ward no I councillor Nl.Lalhruaitluangi Executive Councillor leh Pu C.Zama President EX MNA General Headquarters Aizawl te chuan an tel pui bawk
Post a Comment
He post chungchanga i ngaihdan lo sawi ve rawh: