Aizawl | March 19, 2025: Mizoram khua leh tui dik takte Damdawiina a thlawna inenkawlna tur, 'Mizoram Universal Healthcare Scheme (MUHCS)' chu vawiin khan Chief Minister Lalduhoman a tlangzarh.
Mizoram Universal Healthcare Scheme (MUHCS) hi April 1 atanga hman tan tur a ni a, inziahluh nan thla thum chhung - April, May leh June hawn a ni ang.
Mizoram Universal Healthcare Scheme (MUHCS) atan hian Sorkar laipui scheme AB PMJAY, Mizoram Health Care Scheme leh Sawrkar MR te chu huang khatah chhunfinin, kalphung khat hnuaia kalpui tur a ni a, Civil Pensioner leh Provisional Employee te pawh he scheme hi huamtir a ni.
Damdawiin luh ni leh chhuah ni inkara inenkawlna senso te chu damlo ten pawisa an pek ngai lovin a thlawnin damdawiinah inenkawlna an dawng thei dawn a, Mizoram Universal Healthcare Scheme (MUHCS) hnuai-ah hian tun dinhmunah sorkar damdawiin-ah hman theih a ni.
Mizoram Universal Healthcare Scheme (MUHCS) hospital empanelment hawn mek a ni a, private hospital inziaklut duh te tan inziahluh theih a ni.
Chief Minister chuan, Mizoram Universal Healthcare Scheme hi tun hmaa healthcare scheme kan lo hman thin; private hospital ten harsatna an lo tawh phah tawh thin ang ni lo, an tana scheme him leh huap zo tak ni tura duan a ni a. Kum nga chhunga kan state dinhmun zirchianna fir taka kan neih hnua duan a ni. Kan inruahmanna te bak thil a lo awm palh a, sawrkar hi sum leh paiah lo tlachhe palh thut a nih pawhin bank ten min peksak mai dawn a, chutiang khawpa him tur chuan he scheme hi kan duang a ni. Tin, bill hi ni 30 chhunga pek ngei ngei tur a ni a, ni 30 chhunga sawrkarin sum a pek hman loh chuan a pung (interest) a pe tel thin ang. Sawrkar hmasa khan Asian Development Bank loan hmanga he scheme hi kalpui a tum a, ADB loan hi a la hmin chiah lo va, a kal kalin a lo kal ve zel ang a. Mahse kan sawrkar hi chuan ADB loan tel lo pawhin tha takin kan kalpui thei dawn niin kan hria. Tin, April thla atanga kalpui tan kan tum avangin tuna Healthcare Bill ba kan la neih Rs. 14.50 crore hi tun thla hian pek fel vek kan tum a ni, a ti.
Chief Minister hian, ram hmasawnna leh ram mipuite hriselna hi then hran theih loh thil inzawm tlat a nih avangi, khua leh tui zawng zawngte ban phak Healthcare Scheme changtlung tak neih hi tul kan ti hle a. Hetiang lam ngaihven thin mipuite pawhin an nghakhlel tlang viau niin ka hria. Online leh paperless-a kalpui kan tum a, a changkang hle ang. Cashless system a ni dawn bawk a, a hmangtuten mahni pawisa kan phawrh a ngai tawh dawn lo a ni.
Sawrkar hnathawk, a nghet leh nghet lo te, civil pensioner te, mipui nawlpui leh AB PM JAY hnuaia Golden Card nei zawng zawng te huang khatah kan awmza ang a, kan inziahluh dan a zirin hamthatna kan hmuh theih erawh chu an danglam ve thung dawn a ni.
Inziahluh theih hun ruatah mipuite inziak lut vek thei ila, tangkai takin i hmang ang u. Chhawngkaw tana kum khat Registration fee hi Rs. 2,500 a ni a. Hamthatna hmuh let theih hi Rs. 5,00,000 a ni thung. Kan dawn let theih hamthatna a that em avang hian registration fee hi a to lovah kan ngai a ni, a ti.
Universal Healthcare Scheme a taka kalpui a nih theih nana thawktute zawng zawng chungah lawmthu a sawi bawk.
Thu a sawi zawh hian Chief Minister hian Universal Healthcare Scheme chungchanga Media mite zawhna leh chhanna hun tawite a buatsaih bawk.
A hawnna inkhawm hi Assembly Session chhun chawlh laia buatsaih a ni a. Pu H. Lalengmawia, Commissioner & Secretary in a kaihruai a, Pu Lalbiakzama, Speaker, Pu K. Sapdanga, Home Minister, Pi Lalrinpuii, Health & Family Welfare Minister leh Minister dangte, MLA te leh official pawimawh te bakah chanchinbumite an tel a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: