Aizawl | Feb 10, 2025: MNF Sr. Vice President Dr R Lalthangliana chuan, vawiin chawhnu dar 1 khan Aizawl Press Club-ah thuthar thehdarhtute kawmin, "Vauna leh insawithaihna chi hrang hrang hmanga Minister rualte leh ruling MLA ten vote thlak tura mipuite an rum thaihna thawm hriat tur a tam lutuk hi a runthlak hle." a ti.
Press Statement of
Dr. R. Lalthangliana Sr. Vice President, MNF
*'Democracy venghim turin mipuiten taima takin vote i thlak ang u'*
ZPM sorkarin Local Council leh Village Council dinglaite an thawhpui duh loh vang leh party bil sorkar sawhngheh a tumna vang liau liaua term dinglai thla 6 chuanga a pawt tawi hi Mizoramin mipui rorelna, Democracy a neih hnua thil thleng lungchhiatthlak tak a ni a. 12.2.2025 a mipuite inthlanna min neih luihpui turah hian an vote hlu tak hmanga Democracy venghim tur leh taima taka vote thlak turin MNF Party chuan Zoram mipuite kan ngen a ni.
VC leh LC inthlanna hmachhawn tur hian MNF chu kan inpeih tawh a, mipui rorelna, Democracy venghim turin khua leh veng tinah mipuite duhthlanna ngaipawimawh chunga hmasawnna hna thawktu tur candidate kan dah fel vek tawh a. ZPM sorkarin a thuneihna mipuite a hman khum mekah hian mipuite duhthlanna lo lang chhuak tur chu nghakhlel takin MNF chuan a thlir mek a ni. Tunhnaia a thuneihna hmang suala MNF VC dinglai a dissolve leh suspend Thekpui, Hnahlan leh Sialhawk VC ten High Court-a thiam an chan dan leh Ngur VC an thiah, ni 24.9.2024-a bye election neih zawh taka hnehna kan chan dante thlirin mipuite hian sawrkar mekte chetdan hi mipuite zahlohna ah an ngaihzia a tilang chiang viau ah kan ngai a ni. Tin, kan VC/LC kal mekte hi duhthusam ni chiahlo mahse, mipui tan an thawktha thawkhat viau niin kan hria a, hei hian beiseina sang tak min neih tir bawk a ni.
Vauna leh insawithaihna chi hrang hrang hmanga Minister rualte leh ruling MLA ten vote thlak tura mipuite an rum thaihna thawm hriat tur a tam lutuk hi a runthlak hle. ZPM vote lote chu 'Mirethei in sak tanpuina' (Housing for All) dawntir ve lo tura vauna thawm te, mipuite hamthatna tura duan central scheme hrang hrang hmanga inthlemna thawm te hriat tur a awm a. Cabinet Minister te meuh pawhin 'Opposition VC thlang tlingte tan chuan Minister-te auh eih an harsat hle tur thu' te hial an auchhuahpui duh ta zel mai hi Democracy kalphung kalh tlat a ni a. Mipui sorkar letling chiah, party bil sorkar sawhngheh tuma, khaw eng pawh zah lova ZPM sorkar hmalak mekna hi mipuiten kan vote hmanga kan dodal a ngai a ni.
ZPM sorkarin thuneihna an hum mek hmanga an duh dan apiang mipuite min barhlui chho ta zel mai hi thil vanduaithlak tak a ni. Mipuite dinhmun leh an tlin tawk ngaihtuah chunga zawi zawia tih san thin, chhiah engemawzat uchuak takin an ti sang a, 'vawi leh khatah heti em em chu ni lo rawh se' tia tlawmngai pawlte ngenna pawh mualpho takin an hnawl zel a. Kan ram rohlute tihral kawngah mipui nawlpui duhdan pawh zah lo leh tlawmngai pawl leh zirlai pawl kan neihte dodalna pawh engmahmaha ngai lovin Zoram mipuite hi thuneihna min lek khum mek bawk a. Sorkar awm chhan ber, mipuite zangkhaina leh remchanna siam sak lam aiin, sum leh paia hlawkna tur lam ringawt thlir chunga sorkar thuneihna an hman tak zel avangin kum khat leh thla 2 vel thuneihna an chan chhung lekin mipuite tawrhna a nasa a. Hetianga mirethei zawkte tawrhna thlen zawnga sorkar sum lakluh tih pun an tum mek lai hian, sorkar hotulu leh ruling party hotute erawh nasa takin an in haivur leh si tih Zoram mipuiten an hmuh hmaih lo a ni.
VC leh LC term dinglai, thla 6 aia rei maha ZPM sorkarin a pawh tawi chhan leh zirlaite exam hun lai nen a insu buai chung pawha hmanhmawh taka inthlanna min neih luihpui an tum chhanah hian mipuiten ngaihdan an nei fel vek tawhin kan hria a. Opposition VC leh LC ten sorkar an thawhpui tha duh lo tih sorkar hotuten an sawi rik fo hi thil vanduaithlak tak a ni. Kum 2020-a VC leh LC inthlanna neih hun pangngai a lo thlen khan Covid vangin inthlan hun sawn tlai a tul a. Khatih lai khan Congress VC leh LC an la tam ber a, MNF chu a tlem zawk an ni. MNF sorkar khan inthlan hun pangngai pelin tha takin a thawhpui tluan vek a. Covid dona kawnga India rama a ti tha ber kan nih theih chhan leh, thihpui tlemna ber State kan nih theih chhan pawh kha thil dang bakah Opposition VC leh LC te thliar hrang lova MNF sorkar khan tha taka a thawhpui vang a ni.
ZPM sorkar hian hmasawnna hna thar thawh a la nei mumal lo a, sum leng vak a tlem tih hi tunlaia Zoram pum titi ber a ni mek a ni. Sorkar hnathawkte thla bi hlawh tur pawh puk chawp zela pek ngai anih avangin Mizoram sorkar atangin hmasawnna hna thawhna tur beisei tur a awm lo a. VC leh LC te tan hian Finance Commission rawtna angin Central sorkarin khel lovin hmasawnna hnathawhna tur sum a pe chho mek a. Kum 2025-26 ah pawh hian VC te tan Rural Local Body Grant Rs.74 Crore ruahman a ni a. Khawpuia hman tur Urban Local Body Grant pawh Rs.40 Crore ruahman sa a ni bawk a. Heng sumte hi Mizoram sorkarin a hrek theih hauh loh ani. Ruling leh Opposition VC chungchangah hian tuna kan CM nimek, Pu Lalduhoma hian, "khawtin chan tur Budget siamsak vek a ni tawh a. Ruling neih kher a tul tawhlo, ruling leh Opposition VC te chan tur a inang reng tawh a ni"(Vanglaini, March 12, 2020) alo ti tawh a. ZPM President Pu Lalliansawta chuan, "State sorkar zenpui theihloh turin khawtin chan tur pawh then fel vek a ni tawh. State sorkar pawhin State Own Tax Revenue(SOTR) atangin 15% chu VC te chan turin a dah ngei tur a ni bawk. Chu angin, ruling VC nih avangin hamthat fal bikna tur a awm tawh lo a ni"(Zalen Aug 9, 2020) alo ti tawh bawk a. An sawi dik hle a ni. Heng thil hre chunga ngaihtuahna sengin, naktip maia VC leh LC inthlanna lo awm turah hian ZPM sorkar laka Democracy humhim tura huaisen taka vote thlak vek turin Zoram mipuite MNF chuan kan ngen a ni.
Kutthnathawktute hma ngai bera insawi ZPM Sawrkar hian, an thlai thar Sawhthing, Hmunphiah, Hmarcha leh Aieng te lei sak tura a intiam angin vawiin thlengin an la leisak lova, Sawhthing lei an tum pawh an mamawh laiin leisak thei lovin, Inthlan zawhah leisak an tum leih leih chauh a, an mamawh miau avangin sawrkar lei hun nghak hman lovin tunah hian tlawm takin an hralh mek a. An khawngaihthlak takzet. Kum khat leh thla 2 an sawrkar tep tawh hhnuah pawh khel lova kuthnathawktute thar thin an lei sak leh siloh avang hian rinngam sawrkar an nilo tih a lang chiang hle a, bei tidawngtu te hi rin ngam an ni tawh loh avangin ZPM LC/VC candidate te hi an hnawl ngei kan ring tlat a ni.
MNF Sawrkar kalta leh tuna kan VC/LC ni mek ten ram leh khawtlang tan theihtawp chhuaha hna kan thawhnaah fel tawklo leh fuh tawklo engemawzah a awm ngei ang tih kan ring a, mipuite hriatthiamna kan dilin tha zawk leh chak zawka hnathawk thei turin insiamthat kan ngaihna laiah insiamthain, rilru thar nen kan inbuatsaih a. Mizoram leh kan khawtlang theuh tan theihtawp chhuah turin kan penchhuak mek a, Zoram mipui zawng zawngte hnenah khawngaih Vote min pe a, kan Candidate te chhinchhiahna ARSI a vote thlak vek turin kan sawm takmeuh meuh a ni.
Issued by
MNF Publicity Board
MNF General Headquarters, Aizawl Mizoram
10.02.2025
-------
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: