PATHIANIN SUM KHAWL HI FINTHLAK A TI

_I Tawpna Tur Hmuchhuak Rawh_

PATHIANIN SUM KHAWL HI A FINTHLAK A TI

- Rick Warren

- February 11, 2025

“Mi fing awmnaah chuan ro leh hriak hlu tak a awm a, mi a erawh chuan an dawlh mai thin.” Thufingte 21:20

Sum khawl leh peipun hi Pathian malsawmna dawng turin a pawimawh hle. Sawma pakhat pek leh thil tih that ringawt khan awmzia a nei lo - hmalam hun atan i inbuatsaih tur a ni. Bible pawhin sumkhawl hi finna tehna a ni a ti.

Sum khawl tur chuan i thil lei dawn reng rengah, “Hei hi ka mamawh reng em?” tiin i inzawt thin tur a ni. Thil lei ai chuan khawl zawk ila a tha ang em tih inngaihtuah thin ang che. Pawisa dekchhuakin i hmanhlela, sum khawl leh peipunna hmangin sum chu hna thawhtir ve ang che.

Thufingte 13:11 ah chuan, “Engmah lo mai maia sum dehchhuah chu tihriral a ni ang a; thawhrimna khawl erawh chu a pung ang.” Tlemte pawh ni se hun rei zawk khawl chuan awmzia a nei thin. Engzat nge i khawl tih ai chuan, engtia rei nge i khawl tih a pawimawh zawk.

Mi tam tak chuan, “Ka khawl tam thei lo!” an ti thin. Nimahsela khawl tam loh kha a pawina a awm reng reng lo - khawl tan phawt mai la - mumal takin khawl bawk ang che. Entirna atan, ka nu leh pate chuan sawma pakhat pek bakah naupan lai atanga sum khawl turin min fuih a. Kum 17 ka nihin ka khawl tan a, kartin dollar 1 ka khawl tan a, chu chu zawi zawiin a pung a ni. 

Fing takin sum khawl la tichuan i upat hunah chung i sum khawl leh i peipun te chu i hmang tangkai thei ang. Chu chu finna a taka lantirna a ni a, i thawhchhuah apiang i hman zel aiin a tha fe a ni.

 

Thufingte 24:27 ah chuan, “Pawn lam thil buatsaih la, lo lamah inpeih diam la, chu mi zawhah i in sa rawh.” Solomonan sum chungchanga thu min rawn chu a fiah hle mai - i sum dehchhuahte chu hmang zo nghal vek lo vin peipun tum zawk ang che a ti.

Pathian hnenah i sum chu i khawl duh a nih chuan hetiang hian tawngtai ang che:

Lalpa, malsawmna tam takin min vur a, hengte hi tangkai taka hman ka duh a ni. Awmzei nei taka ka khawl theih nan leh tangkai taka ka hman theih nan min pui ang che. Ka mamawh ni lem lo ten min thlem a nih pawhin, hmalam hun ngaihtuah tur leh nangmah ring turin min pui ang che. Kawng min kawhhmuh la - tlem te te a khawl bek bek turin - chu chu  a lo tling khawm dawn si a. Lalpa, nangman min pek zawng zawngte hi khawhral vek ka duh lo. Sum hman kawngah fel taka che turin leh ruahmanna fel tak siama, ka thutluknate hian i hming a chawimawi theihna turin min pui ang che. Isua hmingin ka dil a che, Amen.  

Ngaihtuah zui atan.

* Pathianin sawma pakhat pe tur chauhin a ti lo che a, sum khawl tur pawhin a ti che a ni? Chutiang tur chuan engtin nge tan i lak ang?

* Sum i khawh ral zung zunga a tawpa a aia pawimawh zawk mamawh deuha i awm hunlai kha i ngaihtuah let thei em? Chutiang chu engtin nge a thlen theih?  

* Vawiinah hian hmalam hun atana sum i khawl theih nan engtin nge ke i pen ang?

[Lettu: Sangpuia]