SUM LEH PAIA SALTANNA AṬANGIN CHHUAK RAWH

_I Tawpna Tur Hmuchhuak Rawh_

- Rick Warren

- February 12, 2025

“Mi zawng zawng hnenah pek tur apiang pe rawh u; leiman pekna tura hnenah chuan leiman pe ula; chhiah chawina tura hnenah chuan chhiah chawi ula; ṭih tura chu tih ula; pawisak tura chu pawisa rawh u. Inhmangaih tawnna ngawt lo chu tuma engmah ba suh u; mahni mihringpui hmangaihtu chuan dan chu a zawh famkim tawh si a.” Rom 13:7-8

Pathianin i kawng a ruahman pakhat chu leiba neih loh hi a ni. Nangmah i inthunun a nih phawt chuan hei hi thil theih a ni. Leiba nei lovin ila awm ngai lo a nih chuan, leiba nei lova zalen taka awm hlutzia i hrethiam lo vang.

A pawimawhzia chu hetiang hi a ni: Pathianin tih tur neiin koh che sela, sum leh paia saltanna avangin ka thei lo i ti maithei a ni.

  

Rom 13:8 ah chuan, “Inhmangaih tawnna ngawt lo chu tuma engmah ba suh u; mahni mihringpui hmangaihtu chuan dan chu a zawh famkim tawh si a.” Chumi awmzia chu i sum neih atanga a tlem thei ang ber i pe a nih chuan, i ba ila tlak lo tihna a ni a, Pathian malsawmna dawn a harsa a ni. 

Chumi paltlang tur chuan, ba rulhna turin ruahmanna fel tak i siam a ngai a ni. Ni e, a harsa alawm, a harsat avangin mi tam takin ba an neih phah reng a ni. Dik tak chuan sum leh pai chungchanga Pathian dan zam hi an zawm thei lo thin a ni. Hengte hi dan zawm tur chu an ni:

1.Zaa sawm Pathian pe la.

2.Zaa sawm chu nakin hun atan khawl rawh.

3.Zaa sawmriat chu ba rulh nan leh khawsak nan hmang ang che. 

Leiba ka rulh hmain sawma pakhat pek leh sum khawl chu ka ti ang maw tiin i inngaihtuah mai thei e. Ni e, leiba i rulh theih nan Pathian tanpuina i mamawh a ni.

Engkim i pek tlak vek hnuah chauh sawma pakhat pek emaw sum khawl emaw tih i tum chauh chuan i thei ngai lo vang. I sum lak luh chu i thil duh zawng leiin i khawh ral zel ang. 

Zaa sawmriat hmanga i khawsa thei lo a nih chuan i tum aiin i khawsa sang tihna a ni. Pathian pe hmasa la, nangmah inpe leh la, i leiba chu pe ang che.

Hun khirh tak i paltlang a nih chuan, i sum en la, sum leh pai chu awmze neiin hmang ang che. Leiba nei lo tura ṭan i lakna chu hriaiin Pathianin a kaihhruai ang che.

“Mi tumah engmah ka ba lo,” i tih hun tur chu ngaihtuah teh. Pathianin rawngbawlna kawnga ke pen tura a duh che chuan ke i pen thei thuai thei dawn a ni. Vawiin hi chu kawng i zawh ṭan ni chu lo ni se la. Pathian ṭanpuina nen chuan - engkim hi tih theih a ni.

 

Ngaihtuah zui atan.

* Engtin nge i leibain Pathian mission chu i thawhna tur dal che?

* Sum khawl leh sawma pakhat chungchang hi a harsa i ti ve em? Eng vang nge emaw eng nge a chhan?  

* Pathianin ti tura a tih apiang che hnial lova, ‘aw’ i tih ve zel theih hun, sum leh paia i zalen hun tur chu engtiangin nge i suangtuah le?

[Lettu: Sangpuia]