PATHIAN NIHNA TAK TAK HRIATNA CHUAN THLAMUANNA LEH BEISEINA A PE

_Hringnuna Danglamna Rahbi_

By Rick Warren 

— Feb 18, 2025

“Chung thuah chuan engnge kan sawi ang le? Pathian kan lama a tan chuan tuin nge min do thei ang? Ama Fapa ngei pawh zuah lova, kan zaa aia petu chuan thil zawng zawng pawh athlawnin min pe tel lo va ngem ni? ... Krista hmangaihna ata chu tuin nge min then ang?” Rom 8:31-32, 35

Thlamuanna i neih theihnan engtin nge Pathian i rin theih ang? A nihna tak tak hriatna aṭangin. Pathian chu nangmah ti mualpho tura lokal anih chuan i ring ngam lo vang. Thudik chu hei hi a ni, "Chung thuah chuan engnge kan sawi ang le? Pathian kan lama a tan chuan tuin nge min do thei ang? Ama Fapa ngei pawh zuah lova, kan zaa aia petu chuan thil zawng zawng pawh athlawnin min pe tel lo va ngem ni?” (Rom 8:31-32).

Pathian chu nangmah tibuai tur chein a nghak che a thlir reng cheah i ngai maithei e. I hun hluia i thiltihte avang chuan a ṭha lo zawngin Pathian i thlir maithei e. Hei hi zawhna a ni: I rilrua landan nge i awih dawn nge Pathian nihna thu diktak zawk? 

Rom 8:34 ah chuan Pathian chuan kan tan anih dan a rawn sawi chhunzawm a: “Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni.”

Isua kha minung a ni a, a thi a, a tho leh a, thiamloh i channa tur ni lo vin, chhandam i nih theihna tur zawk a ni. I thinlungah kawng dangin an hrilh che anih pawhin awih miah suh.

Pathian chu tunge anih chiah? Sam 86:15 ah chuan, “Nimahsela, aw Lalpa, nang chu Pathian, lainatnaa khat, mi khawngaih thei, Thinnel, ngilneihna leh thutak ngah i ni.” Pathian chuan i rilru tihnat a duh lo va, tih mualpho che pawh a tum hek lo. I hrehawmna te a hmuhsak che a, chuvangin, “Hemi kaltlang hian ka ṭanpui thei che,” tiin a sawi a ni. Lainatna ngah tak Pathian a ni si a.

Hetiangin, “Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se. Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin, Krista tuarnate chu kan chunga achuang aliam ang tak hian, kan thlamuanna hi Krista zarah achuang aliam a ni.” (2 Korinth 1:3–5).

Pathian hmangaihna i tem ve theihna tur chuan Pathian hria a, hmangaih a, amah ring mite bulah khawsa ṭhin rawh. Pathian lainatna ngah tak anihzia chu a mite bula i chena, i khawsaka, i inailum tawn hian i hre thei ang.

Beiseina tak tak nei tur chuan, Pathian nihna diktak i hriat a ngai a ni. Chiang taka i hmuh ṭan veleh beiseina pawh i nei ṭan nghal ang.

Ngaihtuah zui atan

* Rom 8:31–32 ah khan Pathian nihna engnge min zirtir, engtin nge min thlir? Chu chuan engtin nge amah i ngaihdan a tihdanglam?

* I rilrua thawhdan mai mai aiin Pathian nihna diktak hriat chu engvangin nge a pawimawh zawk?

* Pathian hmangaihna hrethiama amah beltute nen i chenho theihna turin engtin nge ke i pen ang?

*[Lettu: Sangpuia]*