Mizoram Larsap-in RBI Financial Literacy Week 2025 a hawng

Aizawl | Feb 24, 2025: Mizoram Larsap Gen (Dr) Vijay Kumar Singh in RBI Financial Literacy Week 2025 a hawng.

Vawiin February ni 24, 2025 (Thawhtanni) khan Mizoram Rural Bank Head Office Auditorium ah Reserve Bank of India, Aizawl Office buatsaihin Financial Literacy Week (FL Week) hawnna inkhawm an buatsaih a. He hun hi Mizoram Larsap Gen (Dr.) Vijay Kumar Singh, PVSM, AVSM, YSM (Retd.) Singh chuan hmanpuiin Financial Literacy Week (FL Week) a hawng a. Sum pai inzirtirna lehkhabu (Financial Literacy Messages Booklet) pawh a tlangzarh nghal a. He lehkhabu hi sum leh pai chungchanga mipuiten an tangkaipui theih nan Mizoram a Library hrang hrang 513 a la sem darh tur a ni.

Pu T. Lhungdim, General Manager leh Officer-In-Chage, RBI Aizawl chuan thusawiin, "Kum 2016 atang khan kumtin Reserve Bank chuan Financial Literacy Week (FLW) a hmang thin a. Chung hunah chuan tum bik neiin, thlan bik mipuite zingah an mamawh zirtirna a pe thin a. Financial Literacy Week chuan hman tan anih atangin a kum 10 na hmel a lo hmu ta reng mai a, He Programme kan hman thin hian a tum ber chu campaign chhunga inzirtirna pek tur bik thupui siamte chu mipuite zinga a tam thei ang ber thehdarh a ni," a ti a. Pu T. Lhungdim chuan, "RBI chuan tunkar chhung hian sum leh pai inzirtirna tur thlanbik thupui hmangin theihtawpin Mass Media Campaign hmangin inzirtirna hi a thehdarh dawn a ni," a ti.

Mizoram Larsap pawhin thusawiin Government of India mission pakhat Viksit Bharat 2047 chu kumin FL Week atana thian anih chu lawmawm a tih thu leh RBI in kumtina he week an hmang thin chu lawmawm a tih thu a sawi a. Sawrkar laipui scheme hrang hrang - Credit Guarantee, Social Security leh Entrepreneurship chungchangah RBI hmalak thinna te a tarlang bawk. Mizoram state chhunga Bank leh Financial Institution zawng zawngte chuan mipuiten Bank an dawr vek theih dan turte, beisei awm deuhte phei chu Social Security schemes leh Credit Guarantee system hmang tangkaitu an nih vek theih dan turte ngaihtuaha hma la turin a ngen a ni.

Pu T Lhungdim hian Financial Literacy Van a vailiam bawk a. He Van hi Week chhung hian district panga - Aizawl, Serchhip, Lunglei, Hnahthial leh Saitual ah te a kalkual thin ang a. FL Week thupui hrang hrangte tarlangin mipuite an kawtkaiah zirtirna a pe dawn a ni.

Pi Pankaja Borah, Officer-In-Charge, NABARD, Mizoram Regional Office, Pu Heubert K. Regional Manager, State Bank of India, Mizoram RBO, Pi SheryI L. Vanchhong, Chaiman Mizoram Rural Bank leh Pu Lallungmuana, CEO, Mizoram Co-operative Apex Bank te pawhin he hunah hian thu benglut tak tak an sawi bawk a. FL Week hman anih avanga lawmthu sawina te leh Regulator Iam beiseina anga Mizoram state in sum leh pai inzirtirna kawnga awmze nei zawk leh tangkai zawka hmalak an tum thute an sawi bawk a ni.