LC leh VC inthlan tihhma chhanah chhuanlam tling a awm lo - Aizawl Mayor

LC leh VC inthlan tihhma chhanah chhuanlam tling a awm lo - Aizawl Mayor


Aizawl | Feb 3, 2025: Vawiin hian Mizo Hnam Runah chhung inkhawm neih a ni a, Aizawl Municipal Corporation Mayor Lalrinenga Sailo chuan thu a sawi a. "Mizo sorkar-in Local Council leh Village Council inthlan a tihhma chhanah hian chhuanlam tling a awm lo. LC leh VC te sorkar thawhpui thei lo an awm lo a, ZPM sorkar hian Party dang LC leh VC-te a thawhpui thei lo a ni zawk," a ti.

Aizawl Mayor chuan, Local Council te phei chu AMC hnuai an nih thu a sawi a. "AMC area-ah phei chuan hmasawnna hna tur hmachhawp kan ngah em em a. Kum 2023 - 2024 fund central lam aṭanga lokal tur Vaibelchhe 15 chuang a la awm a, 2024-2025 chhungin development fund vaibelchhe 29 chuang lokal tur a la awm a. Keimahni thawhchhuah ve sum vaibelchhe 13 vel a la awm bawk a ni," a ti a. "Hmasawnna hna thawh tur LC ten an la neih ṭeuh laia an term nasa taka pawh tawi sak hi a dik lo a, an mahni thlang tlingtu mipuite zah lohna a ni," a ti bawk.

Pu Rinenga Sailo, MNF Adviser chuan, "ZPM sorkar aṭanga kum khat pawh tling lovah Sinlung Hills Council kan inthlang a. MNF-in sorkarna kan la a, tun LC leh VC inthlanah pawh hian beiseina sang tak MNF chuan kan nei a. Congress sorkar vanglaiin AMC-ah MNF kan sorkar thei a, mipuite hian party an en vak lo niin a lang a. Tun ṭum LC leh VC thlanah pawh hian MNF-in hnehna sang tak kan chan ngei ka beisei," a ti bawk.

Pu Rinenga chuan, "ZPM sorkar tirh khan mipuiin beiseina kan nei sang hle a. Ram changkangte tih danin ni 100 chhunga an tih turte an puang a. Mipui pawh kan phur hle a, mahse, an hlawhtlinna percent a sang lo hle. Aikal lak, posting, sum remchem leh kawng dang tam takah an sawi loh ang hlirin ZPM hi an awm a ni," a ti bawk.

Chhung inkhawm hi Pu K Lalthawmmawia PAC memberin a kaihruai a, Dr ZR Thiamsanga Adviser, Pu R Lalhnuna PAC member leh Pu Lalchhandama Ralte, vice president-in zin report an pe bawk a ni.




.

Post a Comment

He post chungchanga i ngaihdan lo sawi ve rawh:

Previous Post Next Post