Feb 12, 2025-ah kan inthlang ang em?

~ Zoa Tlau



Mizoram SEC berin a puang a, kan inpuanchah ut ut tawha kan inthlang ngei ang chu! Han tiliam puat dawn ila February ni 03, 2025 hi Mizoram sorkar Gauhati High Court; Aizawl Bench lama a ṭumhnih insawifiahna a ni dawn ta. A court ṭawngkam chu ka hre ve lo a, E. Lungdar VCP leh All Mizoram VC Association President ni bawk; Pu K. Lalngaizuala'n term pawhtawi avanga a khinna kal zêla an ṭanhmun ṭhatna lam an thehluh lehna hun a ni leh a. Hemi zawhah hian thutlukna puanzar a ni tawh ang.

Thu kal tawh tâwi te:
Mizoram sorkar chuan November ni 20, 2024 khan Notification  tichhuakin VC term kal mêk chu ni 19.2.2025 kumtirah a tawp tur thu tarlan a ni a. Thla 6 velin tun term hi pawhtawi a ni ta a, a chhan chu inthlan hmasa kha ni 27.8.2020 a nih kha.

*Pawhtawi chhan:* 
Sorkar thuchhuakah khian pawhtawi chhan mumal tak a awm lo a, Chief Minister-in ni 14.11.2024-a a pawmpuina angin, tih mai hi a ni.

*Gauhati High Court-a inkhinna:* 
An term kal ṭha lai thla 6 laia pawhtawi a nih avangin All Mizoram VC Association chuan Mizoram sorkar chu Gauhati High Court; Aizawl Bench-ah an khing ta a. Firms & Societies Registrations neuh neuh sawi vek lo ila.

*Inkhinna kikawi maktak:*
December ni 6, 2024-a sorkar khinna HC-a an thehluh chu kan tarlan tak ni 20.11.2024-a sorkar Notification (CM pawmpuina tih chauha chhuanlam siam) kha a ni.

HC chuan sorkar Notification ni 20.11.2024 tukah (ni 21.11.2024) khan Notification dang a lo awm leh avangin a hmasa a luahlan (supercede)-a ngaihtuah theih a ni rih lo a ti ta!

Hei tak hi a khingtu hming an hman ber Pu K. Lalngaizuala chuan an khin avanga Notification 'backdate' chawp a nih a ring hial. Order hnuhnung zawk a awm hi an hre lo hrim hrim.

Order hnuhnung zawkah hian *VC term kallai pawhtawi chhan chu Sum harsatna...* tihlam a lo ni ta daih a ni.

Hei pawh hi an khing chhunzawm ta zel a.

*HC Hearing:*
January ni 30, 2024 khan inkhinna hi High Court; Aizawl Bench chuan 'hearing' a nei ta a. Hetah hian sorkar hian an khinna laka invenna/insawifiahna 'report' a thehluh chu HC hian kimchang tawk lovin a hria a ni awm e. Hei vang hian February ni 3, 2025 (Thawhṭanni)-a 'report' thehlut leh turin a ti ta a ni.

Hemi chungchangah hian a khingtu Pu K. Lalngaizuala, All Mizoram VC Association President ni bawk chuan *HLAUHTHAWNNA* a nei. Ni hnih thum chhunga rikrum deuha sorkarin thil a lo siam leh mai a hlau a nih chu!

*Kan inthlang ang em!:*
'Hearing' hmasa angah chuan sorkar hi a insawifiah zo lo chu a ang ber mai. HC chuan sorkar dinglai meuh chu 'second chance' a pe a ang.

A sawifiah zawh loh leh August thla thlen hma chu kan inthlang lo mahna le.

~ Zoa Tlau (02.02.2025)  Dar 9:15 pm
Buannel Cabin, Ramhlun Venglai, Aizawl.

Post a Comment

He post chungchanga i ngaihdan lo sawi ve rawh:

Previous Post Next Post