Aizawl | Feb 27, 2025: Congress-in Sawhthing hralh chungchangah mi dang puh lova a mawha la ngam turin RD Minister an ti.
MPCC chuan, "10th February 2025 Chief Minister ho a Sales Letter an in hlan kha Tripartite Arrangement- Mz State Rural Livelihood Mission, Ropuiliani Farmers Producer Company Ltd leh Reliance Retail Ltd te inkar a ni. 24 February, 2025 a ZPM chhung inkhawmnaa Minister zahawm tak Prof. Lalnilawma’n Chamring leh Sailam atanga Sawhthing lei chungchanga Sawhthing ching tute dem zawnga thu a sawi chiam mai kha a pawi kan ti," an ti a.
"Ropuiliani Farmers Producer Company Ltd hi MzSRLM hnuai an Society/Self Help Group an ni a hriat a ni a, MzSRLM hi Rural Development Department hnuaia Mission a ni a, engvangin nge Sawhthing an thawn chhuah tur hi an thawn chhuah hma hian MzSRLM te hian uluk tak a a check loh, an Minister ber in eng vangin nge a Department te mawhphur tir lo va kan Farmers harsa te te he tianga mawh a phurh tir? Chamring leh Sailam a Sawhthing ching tu chhungkaw 55 te rilru a na hle tih hriat a ni. Hetiang thil a lo thlen takah chuan a Deparment chan MzSRLM te fimkhur tawk lohna hi Minister mawhphurhna a ni a moral responsibility a la ngam tur zawk a ni." an ti.
PRESS NOTE
OF FARMERS DEPARTMENT, MPCC
Tunlai hian kum 1994 Congress sawrkar lai a kut hnathawktu te thlai thar hralhchhuah chungchanga middle-men te lo in rawlh nasa lutuk thinin harsatna a lo siam thin te vensakna a tan a dan a lo siam – The Mizoram Agricultural Produces (Restriction on Movement) order 1994 kha Social Media ah hian a lar hle mai a. Tuna kan sawrkar inthlai thar lei tura hma a lak takah phei hi chuan he dan hi a nihna tak hrechiang si lovin Dan Sakei, kut hnathawktu te rahbehna ang lek leka social media-ah te sawi a lo hlawh takah chuan Congress Party chuan sawifiah tul a lo ti ta a ni.
He dan hi 14th December 1994 ah Mizoram Gazette ah published a ni a, he dan in a tumber chu kan kut hnathawktu ten ram chhunga an thlai thar thenkhatte an hralhnaah harsatna hrang hrang middle-men te an lo in rawlh thin vanga an tawh thin te laka an mahni humhalhna hi a ni ti i la a chiang ber awm e. He dan in a humhalh thlai te chu Iskut, Sawhthing, Hmarcha, Chhawhchhi leh La (Cotton) te an ni. He dan hian phalna bik nei lo te tan chuan heng thlai thlan bik 5 te hi State pawna phurh chhuah a rem ti lo a ni. Kan la hre reng in ka ring a, khang hunlaia Sihphir leh Durtlang a Iskut thar vanglai te khan kan State thenawm a sumdawng middle-men te khan local rate ti chhe khawpin kan Iskut thar te kha rawn leiin Association te pawh kha mangang khawp in an siam a, Vairengte ah te pawh Gate siam ngai khawpin boruak a awm anih kha. Sawhthing chingtu te pawh Iskut ang bawkin middle-men ten rate an control sak tlat a nih kha. Chutiang bawkin Zoram khawthlang tlangdung lamah te pawh kan kut hnathawktu te Chhawhchhi thar te pawh kha local rate siam hleihtheihloh in pawn lam mi ten rate an lo control tlat bawk nen, kan kut hnathawktu te dinhmun kha khang hun lai khan a chep hle a ni. He dan sawrkar in a siam hnu kha chuan kan kut hnathawktu te pawh khan an thar chhuah te rate mumal zawk in an hralh thei ta a ni. A bik takin Sihphir leh Durtlang a Iskut thar te kha rate mumal tak leh awmze nei takin an hralh thei ta a, a tul hunah Sawrkar in MSP (Minimum Support Price) a lo ruahman sak ta bawk a, chhungkaw tam takin vawiin ni hian an dinchhuah phah ta reng bawk a ni. He dan hi kut hnathawktute tan tangkai taka lo hman thin a ni chung hian tunlai hian social media ah anmahni rahbehna ang lek leka sawi a lo awm ta hi a pawi kan ti a, abul abal an hriat chian loh vang te pawh a ni bawk in a lang.
He dan hi kum 1998 a MNF a lo sawrkar khan ennawn a ni a, 14 th July 1999 khan amend a niin The Mizoram Agriculture Products (Prohibition of Movement) (Amendment) order 1999 chuan a rawn thlak ta a. He Order ah hi chuan a hmaa thlai thlan bik panga (5) te bakah Vety sector te, Sericulture sector te leh Forest sector te thleng in rin luh an lo ni ta a ni. Tunlai hian kan sawrkar chuan kut hnathawktu te thar chhuah Sawhthing a lei mek a, a lawmawm tak zet a ni. An in tiam ang ngeiin Sawhthing chingtute tharchhuah zawng zawng hi a bo a bang awm lo va rate bituk Kg ah Rs. 50/- hian lei sak vek se tih hi Congress Party duh dan a ni a, eng Party pawh sawrkar se la kut hnathawktu te dawmkanna Programme reng reng hi chu Congress Party chuan kan policy a nih angin kan support vek a ni. Amaherawh, chu tuna an han lei tan danah hi chuan ngaih that lohna tamtak a awm thei dawn in a lang a. Entirnan – Dt. 20 th Feb 2025 atang a Chhingchhip Cluster atanga lei dan tur an ruahmanna te han thlir khan a thawhkhatna mai pawh ni se la khaw 14 atanga 1080 qtls chauh lei tur a ruahman a nih bakah khaw thenkhatah phei chuan 20 qtls lek lek te a tamna ber khuaah 100 qtls lei tura ruahmanna siamte khan sawhthing thartu te a ti beidawng ang tih a hlauhawm hle mai. Chubakah kan Chief Minister zahawm takin 21 st Feb 2025 a House a Sawhthing chungchang a a thusawi te khan Sawhthing thartu te hi ti hnual lo hram se tih hi Congress Party duh dan a ni.
Tin, Hmunphiah chungchang hi han tarlang leh lawk ila. Hmunphiah hian season a nei a, vanneihthlak takin ruah a la sur lo hlauh a, chuti chung chuan February thla piah lamah hi chuan duhthusam in a lei tlak tawh dawn lo va, a hmanhmawh thlak tawh khawp mai. Tun dinhmunah hi chuan a thartu ten remchang an hriat ang ang in an ti ral ni in a lang a. Zokhaw hmun thenkhatah chuan VC thlan hma khan kg ah Rs.20/- te pawhin anhralh tih hriat a ni. Khawthlang lamah erawh chuan Society pakhat kaltlangin Tripura Kanchanpur lamah Truck trip 3 thawn thlak a ni a, a rate tur erawh chu la negotiate chawp tur a ni awm e. Congress Party chuan kut hnathawktu te khai chhuah hi a policy a ni reng a, chumi a tan chuan theih tawpin hma a la zel a. Kum 2028 a sawrkar-na a chan leh hunah pawh Kut hnathawktu te khai chhuahna turin NLUP changtlung zawk kalpui tum a ni dawn a, hemi ti hlawhtling ngei tur hian hma a la mek a ni.
10th February 2025 Chief Minister ho a Sales Letter an in hlan kha Tripartite Arrangement- Mz State Rural Livelihood Mission, Ropuiliani Farmers Producer Company Ltd leh Reliance Retail Ltd te inkar a ni. 24 February, 2025 a ZPM chhung inkhawmnaa Minister zahawm tak Prof. Lalnilawma’n Chamring leh Sailam atanga Sawhthing lei chungchanga Sawhthing ching tute dem zawnga thu a sawi chiam mai kha a pawi kan ti a. Ropuiliani Farmers Producer Company Ltd hi MzSRLM hnuai an Society/Self Help Group an ni a hriat a ni a, MzSRLM hi Rural Development Department hnuaia Mission a ni a, engvangin nge Sawhthing an thawn chhuah tur hi an thawn chhuah hma hian MzSRLM te hian uluk tak a a check loh, an Minister ber in eng vangin nge a Department te mawhphur tir lo va kan Farmers harsa te te he tianga mawh a phurh tir? Chamring leh Sailam a Sawhthing ching tu chhungkaw 55 te rilru a na hle tih hriat a ni. Hetiang thil a lo thlen takah chuan a Deparment chan MzSRLM te fimkhur tawk lohna hi Minister mawhphurhna a ni a moral responsibility a la ngam tur zawk a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: