YMA Vathuampui Branch-in kum 50na lawm

Aizawl | Jan 7, 2025: Zanin 7ᵗʰ January, 2025 (6:30pm) khán Young Mizo Association Vaṭhuampui Branch chuan Kum 50 tlin champha (Golden Jubilee) lawmna, hun khatna chu YMA Hall, Vaṭhuampui-ah an hmang.

He hunah hian Pu Collin Ralte Organising Vice Chairman chu hruaitu niin, Pu C. Zobuailiana Adviser chuan hunserh a hmang a, Pu C. Vanbiakliana Organising Secretary aṭangin Report leh inhmelhriattirna hun a hmang bawk.

Khuallian Pu C. Ngunlianchuanga MLA Lawngtlai West Bialtu chuan thu sawiin YMA Vaṭhuampui Branch-in a kum 50 tlin champha (Golden Jubilee) an lawm thei chu lawmawm a tiin ropui a ti a, YMA Vaṭhuampui Branch leh Organising Committee-te fakawm a ti tak zet. YMA, YLA kan nih pawhin mi vaw hlum tùr kan ni lo va, kan hnam nunzia leh Kristian nunphung chhawm nung zêl tùr leh, YMA chu mîte ṭanpuitu, riangvai chanhai, rethei leh pachhiate tán innghahna tlak ni zêl tùrin a chah a. Khawi hmunah pawh kan ram kan hnam tán leh keimahni kan tihmingchhiain kan ti hming ṭha thei a ni. Mîte tána hnawksaka awm lo tùrin NGOs, Kohhran leh Politics-ah a inrawlh tùr a ni lo a, Politics a inrawlhna apiangah buaina a awm ṭhin a ti bawk. Khuallian chuan zirnaa ṭan kan lák nasat a ngaihzia leh a tam thei ang bera Officer-a inziak lût tùr leh taima taka zir tùrin a chah a. Tunlaiah zu leh ruihhlo a hluarin a tam êm êm a, ṭhalai tam takin kan thih pui nasa êm êm a, zu leh ruihhlo lakah fimhlim tùrin nu leh pa leh kal khâwm te a chah a, YMA Golden Jubilee Souvenir tlángzarhna a nei bawk.

He hunah hian Pu K. Vanlalhluna President Tuichawng Group YMA, Pu L. Ruatsanga VCP Vaṭhuampui, Gabriel Lalrinsiama President PZP General Headquarters leh Pu Joseph Ngurthanzawna YLA Sub-Headquarters ten thu an sawi bawk a, Zai thiam zai ngaihnawm tak tak ngaihthlak a ni bawk.