I TAWPNA TUR CHU I DUHTHLANNAAH A INNGHAT

_Hmalam Hun Atana Inbuatsaihna_

- Rick Warren

- January 8, 2025

“Nangni lama ka rilru putzia chu ka inhre si a, in hun hnuhnung tawpah chuan beseina pe tur che uin thil ṭha lo ni lovin ṭhatna ka ngaihtuah asin.” Jeremia 29:11

Mi tam zawkin tawpna awmzia hi an hre dik lo fo.  Anni chuan thil engemaw riau emaw dangdai tak emaw, keimahnin kan tihdanglam theih loh ni turah an ngai a ni. Mi thenkhat chuan Pathianin kan tawpna hi chu a rel fel a, engpawh ti la awmzia a nei chuang lo an ti a ni.

A nihna takah chuan Pathianin chutiang chuan a sawi lo. Bible-in tawpna chungchang kawng hnihin min zirtir a.

Pakhatnaah chuan Pathianin i tawpna tur a siam chu thil tha tak a ni. Mi tam tak chuan an tawpna tur chu a chhe lam niin an ngai thin a ni. Mahse Bible chuan, “Nangni lama ka rilru putzia chu ka inhre si a, in hun hnuhnung tawpah chuan beseina pe tur che uin thil ṭha lo ni lovin ṭhatna ka ngaihtuah asin.” Jeremia 29:11. Pathian ruahmanna - tawpna tur chu - i tana thatna tur a ni asin.

I hun liamtaah khan hun harsa tak lo tawk tawh pawh ni la. Hei hi thudik a ni, thawnthu a la tawp lo tih hi. 

Tawpna chungchanga thudik pahnihna chu hei hi a ni: Duhthlanna i siam a ngai. Chu chu i hria em? Bible chuan Pathianin duhthlan tur a pe che a ti. Pathianin i tana ruahmanna a siam tawh chu i hnawl thei a ni. I hmu ngei dawn tihna a ni lo.

Kum 40 zet thlalera an vahvaih tawh hnua ram tiam lut tura Josuan Israel fate a hruai dawn khan zirlai a zirchhuak a ni. Deuteronomy 30:15-16 ah Pathian chuan, “Tunah hian in 

hmaah nunna leh thatna, thihna leh thil tha lo ka dah a; Lalpa in Pathian hmangaih tur te, a kawng zawh tur te, a thupek te, a dan te, a rorel te pawm tura tuna thu ka pek che u hi in zawm chuan nungdamin in awm ang a, in lo pung ang a, in va luah tur ramah chuan Lalpa in Pathianin mal a sawm dawn che u a ni.”

Josua tawnhriat atangin thil pahnih kan zirchhuak thei a. Pakhatna, Israel fate tan Pathianin tawpna tur a buatsaih. An ram luah tur chu a thlansak diam tawh tih leh a la pek tur thu a sawi a ni. Chu hmun chu _Ram Tiam_ tiin a sawi a ni. A pahnihnaah chuan, chu rama thil tha chu an neih tur thu a ni. Mawlmang takin ka pe dawn lo che u a ti a. Duhthlanna siam erawh chu a ngai a ni.

Pathianin i nunah a thil ruahman tawpna tha tak chu chang turin a duh che a ni. Hei hi ka zawhna a ni: Pathianin a siam che angin, tih tur a tuk che angin, a thil pek che angin i nung em tih hi? A lo thleng ngawt dawn lo. Duhthlanna a ni.

Ngaihtuah zui atan

* Rinnaa ke pen tura duhthlanna i siam hnua Pathian malsawmna i nuna a lo thlen lai kha i ngaihtuah let thei em?

* Pathianin a mite hi a siam chhan ang taka nung tura a duh laiin, Pathian siam chhan anga an nun theih lohna daltu engnge nia i hriat?

* Pathianin i tawpna tura ruahmanna a siam chu i chan theihna turin vawiin hian eng duhthlanna nge siam ngai nia i rin? 

*[Lettu: Sangpuia]*