MZP-in FMR ṭhiah leh B'desh aṭanga sahimna zawnga Mizoram lo belte thawn haw pawi ti!

Aizawl | Jan 17, 2025: Vawiin ni 17 January, 2025 (Zirtawpni) chhun dar 12:00 khan MZP General Headquarters Executive Committee meeting vawi 639-na MZP Conference Hall-ah neih a ni a. Meeting-ah hian Free Movement Regime (FMR) hlih chungchangte, MPSC hnuaia hnalak chungchang leh pawl chhung thil pawimawhn hrang hrangte rel a ni.

Meeting chuan, tun hnaiah India sawrkar-in Myanmar leh Mizoram inkalpawhna Free Movement Regime (FMR) a ti tawp hi hriatthiam har a tiin, pawi a ti takzet a. Zofa chhak leh thlanga cheng, u leh nau, hnam leh sakhua thuhmun, awlsam taka inkalpawhna kawngpui khar a ni ta hian Zofate inpumkhatna turah nghawng tha lo tak a neih a hlau a ni. Tun hnaia Myanmar, Bangladesh leh Manipur buaina avanga Mizorama sa himna zawnga lo tlan kan unaute theih ang angin Mizoram-in a tuamhlawm mek a. Chutih laiin, Bangladesh atanga Mizorama sa himna zawnga lo lut mi 28 velte Myanmar ram chhungah thawn let an ni hi Meeting chuan pawi a tiin, a lainat hle a. Bangladesh atanga dan loa lo pem lut Chakma mi sing tel an en liam mai mai laia, Zofate laka India sawrkar laipui hmalak dan hi hriatthiam a har hle a ni. Hemi chungchang hi Union Home Ministry-ah lehkha thawn nise tih a ni.

Meeting chuan, MPSC hnuaia hnalak felhlel nia MZP-in a hriatte a chhui chianna a ngaihthuah a. MZP leh MPSC hotuten dawhkan kila thil felhlel lai nia hriatte sawihoin, MPSC kalphung dik lo lai leh siamthat ngai nia a hriatte sawihona a nei a. Ngun takin hna lak hrang hrangte enzui zel nise tih a ni. Meeting chuan, MPSC hi thalai hna zawng mek ten rinna an nghah zel theih nan leh dik leh fair taka a kal zel theih nan uluk taka enzui zel nise tih a ni.

Meeting-ah hian Zoram Ni hman dan turte, MZP Kum 90-na lawm dan tur leh MZP Establishment chungchang pawh rel a ni a. Meeting hi Pu H. Lalthianghlima MZP President-in a kaihruai a, Executive Committee Member an kal tha hle.