ZORO-in FMR chungchanga Sorkar laipui leh Mizoram sorkar thupek hal dawn

Aizawl | Jan 17, 2025: Free Movement Regime (FMR) kengkawh tura tihna Sorkar laipui order leh Mizoram Sorkar order chu Jan 29 hian ZORO-in an hal dawn.

Vawiin 17.1.2025 (Zirtawp) khan ZORO General Headquarters chuan ZORO office-ah committee meeting an nei a, meeting hi Pu R. Sangkawia President in a kaihruai a ni. Meeting-ah hian India Sorkarin Free Movement Regime (FMR) thiat a, India - Myanmar Border fencing a tum chungchang leh Bangladesh raltlan thawnkir chungchang rel a ni.

India sorkar laipui in Zofa ram hrang hranga chengte zalen taka kan in tlawh pawh theihna Free Movement Regime (FMR) chu thiatin ramri kan turte tan Border Pass neih ngei a tul leh Border Pass neilo tan ramri kan a theih lohna dan chu January 1, 2025 atangin a keng kawh tan ta a. Free Movement Regime ti tawpa India-Myanmar ramri kan tura Border Crossing Permit lak a ngai ta hi Zo Re-Unification Organisation (ZORO) chuan pawi a ti hle a ni. Free Movement Regime (FMR) kengkawh tura tihna Sorkar laipui order leh Mizoram Sorkar order chu ni 29th January 2025 (Nilaini) hian a hal dawn a, Sorkar laipui leh Mizoram sorkar order hi Aizawl mai bakah Mizoram hmun hrang hranga hal turin ruahmanna siam a ni. ZORO chuan Free Movement Regime a tih awpna hi hlip leh ngei turin kan ngen a, he kan dikna chanvo nei let leh tur hian ZORO chuan a tawp thlengin a bei zel dawn a ni. ZORO hmalakna hi Zoram mipui ten thlawp tlat turin kan ngen nghal bawk a ni.

Bangladesh rambuai avangin Bangladesh ram a cheng kan unau ten harsatna nasa tak an tawka mahni sahimna zawngin kan Inpui Mizoram state an rawn bel a, Mizoram chhungah thahnem tak an awm mek a ni. Ni 5, January 2025 khan Bangladesh atangin sahimna zawngin kan unaute mi 28 in Mizoram an rawn lut a, Assam Rifle in lo man in an hreng zui a ni. Hun engemaw chen an awm hnuah ni 11, January 2025 khan Mizoram sorkar leh Assam Rifle ruahmannaa thawnkir an ni. ZORO chuan mahni sahimna zawnga Mizoram rawn bel te thawnkir an ni hi na a ti hle a, kan unaute thawnkir tu Mizoram sorkar leh Assam Rifle te hi demawm kan ti hle a ni. Kan unau sahimna zawnga rawn kal an awm leh a nih chuan mahni Inpui rawn bel na na na chu lo kuangkuah a, lo tuamhlawm thin tawh turin thunei tute kan ngen nghal bawk a ni.