"ZPM sorkar chu India lakah meikhupin an awm," - Tawnluia

 

Kan Bawm unau nunau nena Mizoram rawn lut tawh 28 pawh Mizoram sorkar leh Assam Rifle ten tunhnai lawk khan an nawr let leh a ni.

Aizawl | Jan 17, 2025: Vawiin hian Mizo Hnam Runah chhung inkhawm neih a ni a. Pu Tawnluia, National Core Committee Member chuan thusawiin, "ZPM sorkar chu India lakah meikhupin an awm a. Kan Bawm unau nunau nena Mizoram rawn lut tawh 28 pawh Mizoram sorkar leh Assam Rifle ten tunhnai lawk khan an nawr let leh a ni. Kan unaute thlavang hauh inti ve siin a tak takin engmah an ti tak tak ngam lo a, meikhupin an awm. CM berin pawhin, central thuneihna do ngawt chi a ni lo, a ti a. Sorkar hmasa leh CM hmasa hmalakna leh tun sorkar-in kan unaute thlavang a hauh dan chu a inang lo hle a ni. India sorkar laka unaute thlavang pawh hauh ngam lo sorkar kan hrawn hi a pawi hle," a ti. 

Pu Tawnluia chuan, "ZPM Sorkar hian sum enkawl an thiam loh vangin Financial Crisis an hmachhawn mek a, tuna an dinhmun chu BJP Minister pek nge Zu zawrh, tih a ni deuh maiin a lang. Sum an puk awk awk ṭhin te, oil man an tih san te, buhfai man nasa taka an tih pun te, chhiah an tih pun te hi eng atan nge an hman? Sum leh pai enkawl danah an hlawhchhan chiang hle a ni," a ti bawk. 

Tawnluia MNF NCC member chuan, MNF chu Mizo hnam hmahruaitu atana Pu Laldenga te kaltlanga Pathianin a din a nih thu a sawi a. "Kan ram zalenna atan nunna hlu tak hlantu Martar-te nena ṭhu kan ni a. Martar-te leh pasalṭhate avangin MNF mai ni lovin he hnam hian zahawmna nasa tak a lo khum tawh ṭhin a ni," a ti a. "Pu Laldenga hovin Mizo Nationalism kha chawhnunin awm lo se kan hnam hi chimralin kan awm tawh hial mai thei.  Khang lai khan vai sumdawng an tam em em tawh a, vai sari mawi kan ti ṭan a, vai film pawh hmuhnawm kan ti hle tawh a ni. Hnam leh sakhaw humhalh duhna lo piangta avangin ṭhangtharte luah tlak Zoram kan la nei hi a lawmawm tak zet a ni," a ti bawk.

Pu Lalramzauva PAC member pawhin thusawiin, Mizoram sorkar-in nasa taka VC leh LC inthlan a pawh hnai thubuai chunhchang a sawifiah a. "January ni 30 hian final hearing neih a ni dawn a, engkim a chiang ang," a ti a. "MNF chuan engtik hunah pawh inthlan hi kan cho zak reng a ni. Mahse, sorkar-in thla tam tak hun la nei heti taka an hun a pawt tawi hi a dik lo a. Mi ṭhahnem ngaiten an khing a ni. 'Kan inthlan tlai chuan mipuiin min hrechiang hman lutuk ang a, min vote duh lovang' an ti ni berin a lang a. Mipuite beiseina lem an siam sak a takin a lanchhuah hman an hlauh vanga inthlan hi ti hma an ni," a ti bawk.     

He inkhawm hi Pu Rochhunga Ralte, Adviser-in a kaihruai a, Upa Dr ZR Thiamsanga, General Secretary hunserh hmang a ni.

.