Isua'n a zirtirte tawngtai dan a zirtirna hmun nia ngaih-ah Mizo tawnga ziak Lal tawngtaina tar a ni ta!

Aizawl | Jan 20, 2025: Isua'n a zirtirte tawngtai dan a zirtirna hmun nia ngaih-ah Mizo tawnga ziak Lal tawngtaina tar a ni ta!

Jerusalem-a Isuan a zirtirte tawngtai dan a zirtirna hmun nia ngaih, Church of Pater Noster-ah Mizo tawng ngeia ziak Lal tawngtaina ' Kan Pa Vana Mi' tih chu tar a ni ve ta.

Church of Pater Noster an tih hmun leh a chhehvel bang tinah tawng hrang hrang 150 chuangin Lal tawngtaina hi tar a ni a, Diocese Pastoral Council (DPC), Aizawl Diocese chuan kum 2023 atang khan tar a nih ve theih nan lo buaipui tawhin, December ni 5, 2024 khan Lal Ṭawngtaina hi Church of Pater Noster bangah tar ni tawh mah se, mipui hmuha dah lan a la ni lo va, Durtlang leh Mamit Parish Priest pawh lo ni tawh, tuna Jerusalem a rawngbawlna nei mek Fr. Santosh Lobo, OFM. Cap.leh a thiante chuan Aizawl Diocese leh Mizo mipuite aiawhin ni 11 January, 2025 khan malsawmna leh a hawnna an nei a, a duh apiang hmuh ve theih turin pho chhuah a ni ve ta a ni.

Ram thianghlima hmun pawimawh tam zawk khu Franciscan pawl enkawl a ni a; mahse Church of Pater Noster hmun bik khu Carmelite Sister te enkawl niin a hmun leh a chhehvel pumpui khu France Sorkar ta a ni thung. Chuvangin he hmuna Lal Ṭawngtaina tar ve tur hian France sawrkar hnenah dil a ni. Mizo tawnga ziak, a sentence tin English-a lehlin Lal Tawngtaina Bishop of Aizawl hming ziah hnan an rawn dil chu pek a nih hnuah phalna hmuh chauh a ni. Tiam chin awm lova a tarna hmun chu lei a ngaih ve avangin Euro 3000 vel sen a ni bawk.

MIZORAMAH CATHOLIC KOHHRANIN KUM 100 A TLING TA

Mizorama Catholic Kohhran chu kum 2025 hian kum 100 a tling ve ta a, February ni 1. 2025 (Inrinni) khian Diocese huapa kum khat chhung lawmna Christ the King Cathedral, Kulikawnah hawnna neih a ni ang. Kum 1922-ah Shillonga training-a kal, Pu Aichhûnga, Agriculture Demonstrator chuan Catholic rinna chungchâng ziahna lehkha thenkhat a rawn hâwn a. Chûng lehkhate an lo chhiar atangin mi thenkhatten Catholic rinna chu pawmin, February ni 1, 1925-ah mi 5 - Lianchheua, Thangphunga, Lênga, Chalchhuna leh Lalbâna te, Tlângnuam mi vekten Catholic Kohhran an din ta a ni.

April ni 15, 1947-ah Rev. Fr. George Breen CSC leh Bro. Gilbert Boucher CSC te chu Mizoram thutchilha awm nghet tawh tûrin an lo kal a. Kulikawn-ah thutchilhin Mizoram pumpui an enkawl a. Mizoram pumpui chu Christ the King Parish bial chhûnga awm tihna a ni. Kum 2022 khan Mizorama Catholic puithiamten an thutchilh atanga kum 75-na chu lawm a lo ni tawh a, ringtu mipui pung chho ve zelin tunah chuan Mizoram khaw 57 laiah Catholic Kohhran chu biak in neiin a awm ve tawh a ni.