HLAU LO VIN, RINNAIN I TUM CHU HLEN TURIN THAWK RAWH

_Hmalam Hun Atana Inbuatsaihna_

*HLAU LO VIN, RINNAIN I TUM CHU HLEN TURIN THAWK RAWH*

- Rick Warren

- January 15, 2025

“I hmahruaitu chu Lalpa ani ang a, i hnenah a awm zel ang a, a tithlawn lo vang chia, kal pawh a kalsan tawp lo vang che; hlau suh la, zam hek suh.” Deuteronomy 31:8

ThiI tum lian tak neih chu a tirah chuan a hlimawma,  mahse a chauhthlak a ni. Diktak chuan tum lian tak neih chuan min ti hlauthawng thin a ni. Hlauhna ni lo vin rinnain engtin nge tan in lak theih ang? Hengte hi kawng li an ni.

*Pathian a tel tih tilang rawh.*

Pathian a tel tih i hriat chuan i inringtawk thei ang, i nun kawng engkimah, i thil tum lian tak thlengin Pathian chu a inrawlh a ni. Bible chuan, “I hmahruaitu chu Lalpa ani ang a, i hnenah a awm zel ang a, a tithlawn lo vang chia, kal pawh a kalsan tawp lo vang che; hlau suh la, zam hek suh.” Deuteronomy 31:8

  

*I nuna Pathian hnathawh lo langte en rawh.*

I tum chu a len poh leh hun a duh rei ve deuh ang. Thei pawh a rah i hmu nghal lo vang, nimahsela lei atanga a lo to chhuak chu i hmu ang. Chiang lo riauva a lan pawh hian Pathian chuan hna a thawk reng a ni. Hlauhna leh hnualna kan neih pawhin Pathianin min tanpui dawn a ni tih ring ang che. Pathian duhzawnga i thil tum chu hlen zel rawh, a hun takah Pathian malsawmna i hmu ang.

*Bible-a Pathian thutiamah ding rawh.* 

Thil i ruahman a nih chuan, a harsatna lam thlir suh; Pathian thiltiam thlir zawk ang che. Pathian Thuah thutiam chu zawng la tichuan i thil tum chu a hlawhtlin tir ang che.

Genesis ah khan kan hmu a, Abrahaman a chhiahhlawh hotu hnenah khan tihtur lian tak a pe a: A fapa tan ram hla takah nupui hmuhsak turin a ti a ni. A chhiahhlawh chu a mangang deuh va, nimahsela Abrahama chuan Pathian hnena a thutiam hmang chuan a nemnghet nawn a ni:

“Amah ngeiin a vantirhkoh chu i hmaah a kaltir ang a, chuta tang chuan ka fapa hi nupui i rawn neihsak dawn nia” Genesis 24:7

Bible nena inmil Pathian thilpek thiamna i nei anih chuan, hlau lo va, ring chunga, Pathiana innghat chunga i kal a nih chuan, Pathian chuan a thutiam chu a hlen ang.

*Pathian ruahman thil tha tak chu ring rawh.*

Engtin nge i tana Pathian thil ruahman chu a tha a ni tih i hriat? Bible-ah i tana tha tur thutiam 7000 chuang kan hmu a, amah ring tura zir turin - hlauhna aiin rinna nei turin a duh che a ni.

Pathianin i tum i thawhna kawngah hian vantirhkoh a lo tir lo maithei, a pawi lo, vantirhkoh chu i mamawh lemlo a ni. Pathian Thuah chuan vawi tam, “I kalna apiangah ka awm zel ang” a ti a ni.

Enganga thil lian tham pawh Pathianin i hmaah dah mahsela, hlauhna ni lo vin rinnain chhanlet tum zawk ang che. Tichuan i nuna Pathian hnathawh lo thleng tur chu thlir la, i tana a thatna chu ring ang che.

Ngaihtuah zui atan.

* Engtikah khan nge Pathian duhzawng thil tum i beihna kawngah Pathian hnathawh lo lang thin khan phurna a pek che?

* Pathian duhzawng thil tum i ruahman theihna turin eng Pathian Thu in nge fuih thar che?

* Pathian chu engtiklai pawhin i hnenah a awm tih i hriatna hian i thil ruahmanna kawngah engtin nge i rilru a thlak danglam?

[Lettu: Sangpuia]