HUN ṬHA BAWHPELH SUH

_Hmalam Hun Atana Inbuatsaihna_

- Rick Warren

- January 14, 2025

"Isuan, 'Tih tur khêk suh. Hnunglam hawi lo la. Naktuk a thlen hma chu Pathian ram i bansan thei lo. Vawiin hian thawk rawh.'"(Luka 9:62)

Bible-in mitdel Bartimaia chungchang a sawi a. Nikhat chu Isua leh a zuituten Jeriko an chhuahsan a. Bartimaia, mitdel khan kawngsirah kut a lo dawh a. A bul hnaiah Isua a rawn kal tih a hriat ve leh, "Isu, Davida Fapa, min khawngaih rawh!" tiin a au a nih kha (Marka 10:47).

Khami tûk zing a thawh hlimah khan Isuan a awmna kawng a rawn zawh dawn a ni tih ngaihna Bartimaia khan a hre miah lo. Ni dang ang bawkin a hmun ngaiah, a ṭhutna ngaiah, dinhmun ngaia awmin mi dangte ṭanpuina beiseiin a au nileng leh dawn tih kha a rilrua awm chu a ni.

Mahse rin loh takin Isua a lo kal a. Bartimaia khan Isua a lo chhan dan tur a inbuatsaih hman miah lo. Hun remchang tak a rawn inher chhuak thut a ni. Chu hun ṭha chu bawhpelh erawh a tum hauh lo. Tihkhawtlai emaw hun ṭha dang nghah emaw a tum hauh lo. A hun lai tak khan chet a tum a ni.

Chutiang chiah chu nun bul ṭan ṭhat dan chu a ni. Engpawh ti dawn la, tunah ṭan nghal rawh. "Nakkumah bul ka ṭan ṭha ang" emaw, "Thla lehah thil ka thlak danglam ang" emaw, "Naktukah ngaih pawimawh hmasakah ka nei ang" emaw ti mai mai suh. Tunah i tih loh chuan i ti ngai lovang. Hun ṭha kha bawhpelh suh!

Nitin hian bul ṭan ṭha turin hun pek kan ni, mahse chu hun ṭha chu kan hmang ṭangkai ṭhin lo. Engvangin maw? Kan nghak khawtlai ṭhin.

Nghah khawtlai hi thil mak tak a ni. I tan nun a tiawlsam zawk dawn niin i ngai a, mahse a letling hlauh thung si. Beidawnna inṭanna mai a ni zawk!

Thil ṭha tih tur i hriat chuan vawiin hi tih ṭan hun a ni. Naktuk atan i khek thei an

gah inngai suh.

Bible hian naktuk atana khêk chungchang hi min hrilh nawn fo mai. Naktuk hi ka thleng ngei ang tih tiam ka ni lo, nang pawh i ni bik lo. Isuan, "Tih tur khêk suh. Hnunglam hawi lo la. Naktuk a thlen hma chu Pathian ram i bansan thei lo. Vawiin hian thawk rawh." tiin a sawi. (Luka 9:62)

Naktuk hi i dam thleng ngei ang em tih i hre lo. Engpawh ti dawn la tunah hian ti rawh. 

Vawiin hian bul ṭan ṭha turin Isuan a sawm che em? Khawmuang suh. A hun taka chet chu Bartimaia aṭang khan zir rawh.

Ngaihtuah zui atan.

* I nunkawng eng laiah nge thil khêk sim a i chet nghal a ngaih?

* Naktuk hi dam thleng dawn lo ta ang la vawiin hian engnge i tih ang?

* Khawi hmunah nge Isuan bul ṭan ṭha tura a koh che?

*[Lettu: Sangpuia]*