District tina Hospital-te chu thuam that an ngaiin an veiawm hle

Aizawl | January 28, 2025: Health & Family Welfare Minister Pi Lalrinpuii chuan vawiin chawhnu dar 3 khan District Hospital, Siaha a tlawh a, Sr CMO Dr Lalnunziri leh a thawhpuiten an lo dawngsawng.

Minister Pi Lalrinpuii chuan District tina Hospital-te chu thuam that an ngaiin an veiawm hle a ti a, Siaha District Hospital pawh changtlung zawka siam bakah thawktu indaihlohna kawngah hmalak thuai a nih tur thu a sawi. Natna khirhkhan tak tak, Mizorama enkawl theih loh, sum tam tak senga hmun dang pan ngai natna enkawl theih chu thlurbing an tum tih a tarlang a, State Organ & Tissue Transplant Organisation (SOTO) te, Neuro surgery department hawn te bakah Cardio Thoracic & Vascular Surgery leh In-vitro fertilisation (IVF) lamah tan lak an tum thu a tarlang bawk. Siaha District hospital tan CT Scan an ruahman tawh thu te, Medical Officer dah belh tur thu te leh CSR sum atangin dialysis khawl 4 an ruahman sak tawh thu te a tarlang bawk a ni.

Doctor leh nurse-te chu an hnaah inpekna thinlung nei turin a sawm a, an tawngkam khat pawh midang tan damna a ni tih leh an hna chu Missionary hna a nih thu hre reng turin a chah. District Hospital in harsatna hrang hrang an neihte chu a hriatpui thu leh chung harsatna sukiang tura hmalak thuai a nih tur thu a sawi bawk a ni.

Minister puala hun tawi DMS Hall-a buatsaihah hian Dr Lalnunziri, Sr CMO chuan welcome speech a sawi a. District Medical Superintendent Dr C Lalrosanga chuan hospital inrelbawl dan leh harsatna an neihte a tarlang bawk. Dy CMO Dr Lalrengpuii Ralte chuan vote of thanks sawiin hun tih tawp a ni.

Minister chuan Hospital a tlawh zawh hian Nursing School building a tlawh tel a, sak zawh tawh si luah theihloa a la awm chhan te zirchiangin contractor te chu zo thuai turin a chah a, tun kuma luahluh theih tura peihfel thuai turin a hrilh a ni.