BJP Mizoram President-in mi 140 chuang lawmlut

Aizawl | Jan 31, 2025: BJP Mizoram chuan vawiin 31st January 2025 Zirtawpni hian Mamit District Damparengpui khua ah mithar lawmluhna hun hmangin, Damparengpui Community Hall ah hun hman a ni a, Pu A Lalropuia BJP Mamit mandal President in inkhawm akaihruaia, BJP State President Vanlalhmuaka chuan BJP-ah Mithar 149 lawmluhna leh thusawina hun a nei a, BJP Mizoram State Core Group Member Dr K Beichhua MLA in thusawina hun a nei bawk a ni.

BJP Mizoram State President Vanlalhmuaka chuan Village Council inthlan kan hnaih leh ta a, PM Scheme kal tlang a insak ṭanpuina mamawh an awm chuan, a mamawh tu dik tak ten an dawn theih nan khawtlanghruaitu te an pawimawh hle a, chung mite chuan insak ṭanpuina an dawn vek theih nan hma kan lak pui dawn a ni a ti.

Hmuaka chuan PM Ayushman Bharat, Golden Card kal tlanga damdawiin a inenkawlna senso tur a thlawna hman theih pawh, dik tak leh fel taka kalpui ani anga, PM Schemes hi mi retheite tana hamthatna leh awlsamna ani a, chuvangin heng mai nilo, PM Scheme dang ah te pawh Damparengpui khaw mipuite'n BJP VC candidate palite in thlan tlin vek chuan in dawng vek dawn a ni a ti bawk.

Dr. K. Beichhua chuan thusawiin, Ka hna pawimawh tak bansanin, kan ram leh hnam hmasawn nan politics ah ka zuanglut ve a, independent candidate niin bul ka ṭan phawt a, ka tling zo ta lo a, party zawm neiin opposition MLA kan han ni chho a, chumi hnuah Minister kan han ni chho leh a, Kum 2023 khan Cabinet Minister ni tura sawmna pawh lo dawng mah ila, Central Sawrkar BJP ka thlang ta zawk a ni. Harsatna nasa tak paltlang chungin Pathian leh mipui zarah Siaha bialah thlan tlin ka lo ni ta a ni. Tun hmaa Politics-a ka zinkawng ang khan Opposition MLA nih leh phawt hi ka tan Pathian ruat a ni ang, tiin ka pawm thlap a ni.

Tuna kan sawrkar hrawn mek te hi kan sawichhiat ngawt hi a thiang lo, an hna thawh dan dik tak hi han thlir ila, chutah chuan judgement kan pe tur a ni. Mipuite hian buhfai, tuialhthei, kawngpui, kuthnathawktute, khawtlang dinhmun te han ngaihtuah ila, sum leh paiah harsatna kan tawh leh tawhloh te kan ngaihtuah chian a ṭul a ni. Tuna kan sawrkar hi kan enchhin mek a, la enchhin zel ang u, kan tih leh tih loh chu mipuite'n kan khawtlang dinhmun kan teh dan aṭangin kan chhut thiam a ṭul a ni. Kan ṭhenawm Tripura ah erawh development a zuanin a zuang mek a, Keini aiin mihring an tam zawk mahse hma an sawn chak zawk tlat a ni. BJP hlauhna state kan ni hi a pawi hle a ni a ti.

Dr K Beichhua chuan Damparengpui hall hi siamthat a ngai ve tawh hle a, BJP candidate-te in thlan tlin chuan he Hall sak ṭhatna tur hian cheng nuai 1 pek in ni nghal ang. Chu chu hna kan thawh hmasak tur zinga mi a ni. Mamit District 'Aspirational District' hi Pu Modi-a'n a ngai pawimawh a, Central Minister-te'n vawi tam tak an rawn tlawh che u a. Mamit hi Pu Modi-a hian a ngai pawimawh a, min ngai pawimawhtu hmasawnna kan hmuh ve duhtu party, BJP hi kan hnawl a thiang tawhlo a ni. Tun aia dinhmun ṭha hi Damparengpui khaw mipuite leh Mamit District te hian kan phu a ni a ti bawk.

Inkhawm ah hian J Lalrimawia BJP Mamit District President in lawmthusawina hun hmangin, District hruaitu ten thusawina hun an hmang bawk.