Zudio LPS Pro Fight 2024
RESULT - SEMIFINAL
Zan 25-na November 30, 2024 (Inrinni) - Bout 5 @ LPS Arena, Falkland
BANTAMWEIGHT
Eric Lalthangkima (Darlawng) bt Sebastian VL Rinnunga (Ramthar Veng)
= Unanimous Decision (40-36, 39-37, 39-37)
WELTERWEIGHT
Lallawmawma (Tuipui) bt Lalnunsanga (Chawnpui)
= Unanimous Decision (40-36, 40-36, 40-36)
MIDDLEWEIGHT
C Lalduhawma (Bethlehem Vengthlang) Zoremsiama (Seling)
= Unanimous Decision (40-36, 40-36, 39-37)
LIGHTWEIGHT
C Lalhruaitluanga (Cherhlun) bt Vanlalnghaka (Bungkawn)
= Unanimous Decision (39-37, 39-37, 39-37)
FLYWEIGHT
Lalrinngheta (Tuipui) bt Emmanuel Vanlalthlengliana (Melthum)
= Unanimous Decision (39-37, 39-37, 40-36)
GIG Motors Fighter of the Night (Rs 2500)
- Lalrinngheta (Tuipui)
* December 3, 2024 (thawhlehni) zanah bantam, welter leh middle-ah title chuh tur zawnna final neih a ni ang a, Mizo hmeichhe boxer beiseiawm pali inlan telin Women's Challenge Fight inhnek vawi hnih a awm dawn a ni.
Zudio LPS Pro Fight 2024
FIXTURE
Zan 26-na December 3, 2024 (Thawhlehni) - 8:00 PM : Bout 5 @ LPS Arena, Falkland
WOMEN'S CHALLENGE FIGHT
BANTAMWEIGHT
B1 L Vanlalduatsangi (Siaha) v Lalbiaknii (Kolasib)
LIGHTWEIGHT
B2 Rebecca Lalfakawmi (Chuhvel, Mamit Distict) v Rudy Lalhmingmuani (Salem Veng)
FINAL (TITLE CHUH TUR ZAWNNA)
BANTAMWEIGHT
B274 Omega Lalramdina (East Kulikawn) v Eric Lalthangkima (Darlawng)
WELTERWEIGHT
B275 Zoremsanga (Venghlui) v Lallawmawma (Tuipui)
MIDDLEWEIGHT
B276 F Lalthanliana Jr (Electric Veng, Lunglei) v C Lalduhawma (Bethlehem Vengthlang)
Zudio LPS Pro Fight 2024
REPORT - SEMIFINAL
Zan 24-na November 29, 2024 (Zirtawpni) - Bout 5 @ LPS Arena, Falkland
MIDDLEWEIGHT
F Lalthanliana Jr (Electric Veng, Lunglei) bt John Lalruatsanga (Kawlkulh)
= Split Decision (37-39, 39-37, 39-37)
* A tir lamah kum 24 mi Thanliana'n chet a harsat a, round thumna atangin tharum nei zawk a nihna lantirin a nawr tam a, Kawlkulh boxer Ruatsanga lakah a chak hram. A vawi khat nan Pro Fight champion nih a tumna kawngah Electric Veng, Lunglei boxer-in rahbi a tuk sang zel a, judge pahnihin 39-37-a an chaktir laiin pakhatin 39-37 thovin lehlam a pe tam a, round li an inhnek hnuah derthawng takin title chuh tur zawnna final a lut.
Pro Fight-a a tel vawi khatnaah kum 25 mi Ruatsanga thahrui a fei tawk lo va, round hmasa berah lehlam inhawn laiin a bekah a hneksak fo a, a vei leh ding chhuah zawnin a tibuai bawk. Round hnihnaah Thanliana'n chiang takin a hnek nghal a, inringtawkna thar nen panin hnek thui zawk a nihna awmze neiin a hmang a, Kawlkulh tlangvalin hnek letin nalh taka a dawm fo bakah hnek dan hmang hnem zawk a ni bawk. An inhnek tawk hle rualin Thanliana'n tharum a nei a, round thumna atangin Ruatsanga a tla hniam a, a ngila a vei leh ding a chhuah zawn thin dang hneh loin a taksaah a hneksak tel bawk a, a tawp lamah a chhang let zo tawh lo.
BANTAMWEIGHT
Omega Lalramdina (East Kulikawn) bt Lalruatdika (Hmunpui)
= Unanimous Decision (40-36, 40-36, 40-36)
* Ramdina'n nuam ti takin inhnek a thunun a, Hmunpui rawlthar Ruatdika lakah round li la vekin chiang takin title chuh tur zawnna semifinal a pal tlang. Kum 22 mi East Kulikawn boxer hian tawn hriat nei zawk a nihna lantirin tha taka inveng chungin dik tak takin a hnek a, Kum 19 mi Ruatdika'n chet a harsat tluan.
Pro Fight kal mekah Ramdina khelh that ber a ni a, a ban seina hmangin tawlh kual paha a hnek thin a hlawhtlingin vawi khat aia tam a chhuah fo bakah tum dang aiin a hnek chhuak tam a, a fuh hnem. Hmunpui boxer-in hnaih chilhin hnek fuh chang nei ve mah se an kut chhuak a inthlau a, round lina tawp dawnah Ramdina'n vawi ruk hnek fuh zawnin a talbuai a, mahse, tlu lovin Ruatsika a ding tluan a ni.
FLYWEIGHT
Vanlalenkawltira (Dinthar, Champhai) bt C Lalchhanhima (Mamit)
= Technical Knockout (Round 2, 59 sec)
* Kum zawnin title fight-ah Enkawla inlan dawn mah se a duh danin hnehna a chang lo va, hliamin round hnihna tirah Mamit boxer Chhanhima beiseina a tihtawpsak. Round hmasa berah beiseiawm takin kum 20 mi Chhanhima a inlan a, inhnaih chilhah hnek rang zawk a nihna lantirin Enkawla kut chhuak a nghet ve thung a, lehlam taksaah hnek telin an inngam tawk hle. Round hnihna an tan rualin Dinthar Champhai boxer-in nawr nghalin a hnek zawn a, Mamit tlangvalin a mitko vei lama hliam a neih tawh saah harsatna a tawh belh a, second 59 chiah a kal hman tihin inhnek zui an rem ti lo. Technical knockout-a chaktir a nih rualin kum 22 mi Enkawla'n Chhanhima tawrhna hriatthiampuiin a kuah a, a chak dan chu a duhthlan a ni lo tih a lantir tel.
Nikum khan title fight-ah NT Lalbiakkima a hneh teuh hle a, kuminah champion lai Biakkima a tel theih loh avangin semifinal-a chakin title an chuh tlang nghal dawn a, December 6 zanah a vawi khat nan champion tumin Enkawla'n title a chuh nawn dawn a ni.
LIGHTWEIGHT
Lalkhawngaiha (Venghlui) bt Lalruatmawia (Chhiahtlang)
= Split Decision (39-37, 37-39, 39-37)
* Venghlui rawlthar Khawngaiha'n thiamna tha tak hmangin tharum leh thahrui ngah Ruatmawia zin kawng chhinchhiahtlak a tihtawpsak a, a vawi khat nan Pro Fight title fight-ah a inlan ang. Pro Fight-a a tel vawi khatnaah hriat hlawh lo Chhiahtlang tlangvalin mipui rin dan thiahtin inhnaih chilhah a bitumte aia hnek zawn rei thei leh a tawp rat thlenga mar pata hnek reng thei a nih avangin rih hlawh Ramdinthara leh seeded boxer dang Vanzairemmawia a lehthal tawh a, Khawngaiha'n hnaih rei duh lovin a thiamna a hmang a, round hnuhnung lamah tla fual deuh mah se judge pahnihin 39-37-in an chaktir a, pakhatin 39-37 thovin kum 20 mi Ruatsanga a chaktir a ni.
A tir atangin Khawngaiha'n ruahmanna tha tek nen a hmachhawn a, tawlh kual paha fuh taka a hnek bakah an inhnaih laiin rang taka a hnek zawn hnuah a inthiarfihlim a, round hnihna thlengin kum 20 mi Ruatsanga'n a tum anga chet a harsat. A tawp thlengin thiamna takin Khawngaiha'n a khel a, inhnek thiam zawk a nihna a lantir tel bawk. Mahse, a thahrui tla hniam hret hretin na taka amah nawrtu Chhiahtlang boxer kutchhuak a veng seng lo fo a, chuti chungin round lina thlengin fim takin a bei tluan a, chak phua a inlan rualin a vawi khat nan GIG Motor Fighter of the Night-a thlan a ni.
Title kalsanin welter-ah light champion HC Lalramfela a insawn a, hei vang hian title chuh tur zawnna final hranpa a awm a ngai lo va; title fight-ah Khawngaiha'n semifinal lehlama inhnek tur Vanlalnghaka (Bungkawn) leh C Lalhruaitluanga (Cherhlun) inkarah chak zawk a hmachhawn ang.
WELTERWEIGHT
Zoremsanga (Venghlui) bt HC Lalramfela (Chawngtlai)
= Split Decision (37-39, 39-27, 39-37)
GIG Motors Fighter of the Night (Rs 2500)
- Lalkhawngaiha (Venghlui)
* A unaupa Khawngaiha'n hnehna chhinchhiahtlak a chan hnuah Remsanga'n a chak tawha ropui ber a tawng ve thung a, Pro Fight-a vawi hnih champion tawh Ramfela a lehthal. Round khatnaah ngampa tawk lo mah se round hnihna atangin a insiam rem a, judge pahnihin 39-37 ve vea an chaktir rualin Chawngtlai chhuanvawr hneh nan a tawk.
2015 bantam champion Ramfela'n hming a chherna Pro Fight-ah a hnuhnung hmangin chona thar a hmachhawn a, light title kalsanin welter-ah a insawn. Weight pathuma champion hmasa ber ni chunga ropui taka thlah liam a tumna a puitlin zo ta lo va, amah aia hnek rang leh chet vel awlsam zawk lakah harsatna tawkin round thumnaah a hnek ve mang lo va, lehlam a chungnung hle.
Remsanga'n chiai deuh taka bul a tan laiin boruak nei Ramfela'n a thiam bik a vei lamin vawi hnih a vai fuh zawn a, a ding lama chiang taka a hnek hnuah a nawr hneh. Round hnihna atangin Venghlui boxer a inveng tha a, rang taka a hnek let zawn bakah nalh takin a dawm a, khel tha chho zelin round thumna a awpbet zui. Round hnuhnung berah thapui thawhin kum 29 mi Ramfela a insang mar a, a hma aiin a hnek chhuak tam a, an inhnek tawn hle. Remsanga'n a ngila thui taka a hnek a tangkai ve thung a, judge pakhatin 39-37-in Chawngtlai chhuanvawr pe hnem mah se tun hma angin a zuan a zang lo va, chu chuan a uai fual.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: