"Kumtin kan pawisa hmuh tur hi kum 5 hma lamah kan hre lawk, VC term pawhtawi hi chhan leh vang mumal a awm lo." - MNF Sr. VP Dr R Lalthangliana
Aizawl | November 29, 2024: Vawiin November ni 29, 2024 (Zirtawpni) hian Mizo Hnam Runah chhung inkhawm neih a ni a, hun hnihna political session-ah MNF Senior Vice President Dr.R.Lalthangliana chuan15th Finance Commission hnuaia post devolution kan tih mai PDRDG a kiam chhoh nasat tak em avangin sum harsatna a awm lo theilo a, hei hi a hma daih atanga hriat lawk vek a nih thu a sawi. Kum 2021-2022 ah 1790 crore (thlatin 149 crore), 2022-2023 ah 1615 crore (thlatin 134 crore), 2023-2024 ah 1474 crore (thlatin 122 crore), 2024- 2025 ah 1079 crore (thlatin 115 crore) leh 2025-2026 ah 586 crore (thlatin 48 crore) chauh kan hmu tawh ang, a ti a.
Dr.R.Lalthangliana chuan, "Kumtin kan pawisa hmuh tur hi kum 5 hma lamah kan hre lawk vek tawh a, urban local body leh rural local body atana kan sum hmuh tur, khu lamin min pek tur zat hi kan hre sa vek a. VC inthlan hma chhanah LAD Minister-in a sawi nen chuan inpersan tak a ni," a ti.
"VC term September ni 7, 2025-a tawp tur chu nasa taka pawh tawi a niin, February ni 19th. 2025 ah chhan leh vang mumal awm lovin sorkar chuan a titawp a. Home Minister te, LAD Minister te, Health Minister leh Adviser to CM (Pol) thusawite hi a inang lo theuh a. Sum harsat vang tih te, thawhpui an harsa tih te, fur ruahtui tlak hma tihte an sawi dan a inanglo nuk mai. Sorkar chuan a duh chuan thuneihna a nei teh reng mai a, mipuiin duh taka an thlante hi MNF leh Congress kha chuan kan sawisa ve vak vak ngailo," a ti bawk.
Dr.R.Lalthangliana chuan, "PDRDG tlahniam zel hi 15th FC-a kan luh tan, kum 2021-2022 atangin kan hre lawk vek tawh a. PDRDG a tlakhniam zel rual hian share of taxes a kan hmuh a pung chho ve zel thung a, 14th finance commission a kan hmuh loh, RLB Grant chu 15th FC ah hian kan hmu tha viau bawk a. Democracy ramah sum harsatna chhuanlama mipui thlan ngei, VC-te term pawh tawisak hi thil zahthlak tawp khawk a ni," a ti bawk.
Inkhawm hi Pu R.Lalhnuna PAC chuan kaihruaiin, Pu Lalbeiseia Secy.MNF Gen.Hqrs.chuan hunserh a hmang.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: