WBC Youth Bantam World Champion thar Laldinsanga

Aizawl | December 1, 2024: LPS Pro Fight champion Laldinsanga'n a chanve an inbeih hnuah hnek tluk tumin a nawr tluan a, inrinni zan khan Bangalore-ah Michael Decardi Nelson hnehin WBC Youth bantamweight world title a la.

Super Fight Series inhnekpui berah kum 21 mi Dinsanga'n round nganaah a hnek tlu teuh hle a, round riat thlengin Ghanaian fighter Nelson ding tluan mah se judge pathum point pekah chungnung takin 79-71, 77-74, 78-73-in a chak.

Ramthar, Lunglei tlangval hi Mizo zingah WBC Youth world champion ni thei pahnihna a ni a, professional a luh chilh atanga vawi kua a inhnek tawhah chak vekin Mizo boxer zinga chak zawn rei ber a ni. World Youth title a hnek chhuah hnuah a vawi khat nan December 6 zanah a inlan nghal dawn a, Pro Fight bantam title humhim turin LPS Arena, Aizawlah a inhnek ang.

March 6, 2021 khan LPS Fight Night, Aizawlah Lalrinsanga Tlau chuan super featherweight-ah Ghanaian boxer Eric Quarm a hneh a, Mizo zinga WBC Youth world champion hmasa ber a ni. Professional a luh chilh atangin vawi sarih a chak zawn hman mah se February 26, 2022 hnuah a inhnek zui tawh lo.

September 21 khan Dinsanga'n Bangalore-ah tawn hriat tha tak nei tawhin, round khatnaah technical knockout-in Mohd Junaid a hneh. A tir atangin kum 22 mi Nelson-a hmaah a inringtawk a, a hnek a rangin a hlawm tha a, round lina thlengin pangngai takin Ghanaian-in a bei let.

Round ngana laihawlah Dinsanga'n chiang taka a hnek hnuah hruihrual kilah huap chepin rang takin a hnek zawn a, lehlam chiaiin a tawlh kual. Mizo boxer hian hual chep lehin a beka a hneksak hnuah Nelson hian kuah tumin a bawh a, lo insasengin chhuatah a tlu. A hnuah Dinsanga'n umin a hnek hmain a lo kuah a, a point an paihsak.

Round thum dang an inhnek zui leh chhungin Dinsanga'n nawr char charin a hnek tam viau a, round riatna a zawh thlengin tawlh kual chungin Nelson a inveng a, hnek leh ve thin mah se a bet zawk hle a, chau tak chungin a ding tluan hram a ni. 

Inhnek dangah Pro Fight middleweight champion C Lalhruaitluanga'n WBC India title chuhin a chak zo lo ve thung a, Ritesh Singh chuan unanimous decision-in a hneh. Tlawm nei lova Ritesh-a chak zawn vawi ngana a nih laiin Chawngtlai boxer Hruaia erawh a inhnek hnuhnung tum thumah a tlawm vek a, a hmain pro boxing a luh chilh atangin tum sarih a chak zawn a ni.

WBC India champion Vanlalawmpuia'n round linaah Kagimu Ivan Kigga a hnek tlu a, Ugandan boxer tho leh mah se round riat an inhnek hnuah unanimous deision-in Khuangthing fighter a chak. Awpa hi Mizo zinga pro boxing khel tam ber niin vawi 14 a inhnekna a ni a, tum 10 a chakna a ni.

Kum khat chuang a awl hnuah WBC India champion F Zoramchhana'n a inlan leh a, Filipino fighter Noberto Tano nen round ruk inhnekin chiang takin a chak a; Cherhlun tlangval hi professional huangah vawi riat a chakna niin, tum thum a tlawm tawh a ni.

~ T-a

.