National Shooting C'Ship-ah Mizo silai kap thiamte che ṭha

Aizawl | Dec 24, 2024: 67th National Shooting Championship December 15 - 31, 2024, Bhopal a neih mek ah Mizoram aiawh a shooter kal te an che ṭha hle a. Rifle Men's Team ten an match zo fel tawhin result lawmawm tak an nei a ni.

David Vanlalhruaia Zadeng, S/o Thantluanga Zadeng, Khatla chuan 50m Small Bore Rifle Prone (senior master men category) ah 594.6 score in Mizoram tan Gold Medal a la a, Shooting sport ah Mizoram tan National ah Gold Medal la hmasa ber a ni.

Erast Lalhruaimawia S/o C Malsawmkima, Khatla chuan 10m Peep Sight Air Rifle Men Individual ah 618.4 score in India Team selection trial turin a qualify a, 2025 ah trial hi a nei chhunzawm ang.

Tv. Fabian Lalrinliana S/o Sânghluna, Tlangnuam chuan 10m Peep Sight Air Rifle Men Individual ah 606.8 a score bawk a ni.

Heng mizo shooter pathum te hi ISSF Rules ah National Shooter (Renowned Shooter) an ni vek bawk a ni.