I NEIH ṬHA BER PATHIAN PE RAWH

_Isua Tan Hmun Ka Siam Dawn Em?_

By Rick Warren 

— Dec 25, 2024

“In chhungah an va lut a, a nu Mari hnena naute chu an hmu a, an bawkkhup a, chibai an buk a; tin, an ro bawmte an hawng a, a hnenah chuan lawmna - rangkachak te, beraw te, murra te - an pe a.” Matthaia 2:11

Khawchhak mifingte khan Chhandamtu pek tiam khan an zawng a, an thil neih tha ber pek an tum a ni - an thil neih tha ber bakah lawmnate, chibai bukna leh hmangaihnate an hlan tel a ni. Mifingte chuan chhan dik tak neiin Isua hmuh an tum a ni.

Mi tam tak chu mamawhna an neih avangin Pathian hnenah an lo kal a - nimahsela chibai buk duhna emaw hmangaihna emaw an nei tak tak lo thung a ni. Pathian chu mi an dilna pe theitu, tawngtaina neia an duh apiang pe mai theiah an ngai a ni. Chu ngaihtuahna dik lohna chu hei hi a ni: Pathian chu i tan a nung lo va, a tana nung i ni zawk. 

Mifingten Bethlehem an thlen khan, “In chhungah an va lut a, a nu Mari hnena naute chu an hmu a, an bawkkhup a, chibai an buk a; tin, an ro bawmte an hawng a, a hnenah chuan lawmna - rangkachak te, beraw te, murra te - an pe a.” Matthaia 2:11

Chibai bukna chauh nei lo vin, an thil neih hlu berte pein an robawm an hawng a ni. An thil neih chuang bang emaw hlu vak lo emaw an pe lo va. An thilpekte chu a man a tam a, awmzia a nei bawk a ni.

Rangkachak chuan lal nihna a entir a. Hmanlai chuan lal nihna an hlan thar chu rangkachak an pe thin a ni. Chu thilpek hmang chuan mifingte chuan Isua chu lal a nihna an nemnghet a ni. 

Beraw chuan Pathian chibai bukna a entir a ni. He rimtui hi Judaten temple-a chibai an buknaah an hmang thin a ni. Chu thilpek hmang chuan mifingte chuan Isua chu Pathian dik tak leh chibai buk tlak a nih zia an nemnghet a ni.

Murra chuan thihna a entir ve tlat thung - nausen en nana an hman ngai vak loh a ni. Hmanlai chuan murra chu mitthi ruangah an hnawih thin a ni. Chu thilpek hmang chuan Isua chu Chhandamtu thi tura lo kal a ni tih mifingten an nemnghet a ni.

Isua kha nung tur ringawtin he khawvelah a lo kal lo.  Ngaihdam i nih theih nan, nun thar i neih nan leh vanram i luh theih nan i sualna avangin he leiah thi turin a lokal a ni.

Krismas-a Isua i zawnnaah hian, awmze neia Isua zawngtu mifingte hnen atang hian zirchhuak ang che. Lalte Lal, pathian te Pathian leh khawvel Chhandamtu a nih vangin chibai buk la, i neih tha ber hlan rawh. A ni chu chibai buk phu ngawih ngawih a ni.

Ngaihtuah zui atan

* Pathian chu i duh zawng zawng i thlenna leh i mamawh apiang pe tura i beisei hunlai a awm em? A hmaah inpuang ang che. A hnen atanga i duh chauh nei tur ni lo vin amah i hmangaih theihna turin dil ang che?

* I neih chuang bang mai mai ni lo, i neih tha ber pe tura i inthlak danglam theih nan eng nge i tih ngai le?

*Pathian thilphalna chu Isua Krista kaltlanga Chhandamna min pekah hian a ni.*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu: Sangpuia]*