Aizawl | December 11, 2024: MZP-in AMC hnuaia hna lakah thil dik lo inrawlh a awm ngei nia hriain a rang thei ang bera sut turin an ti.
Vawiin ni 11 December, 2024 chawhma dar 11 khan MZP General Headquarters Extended OB Meeting neih a ni a. Meeting chuan tun hnaia Aizawl Municipal Corporation (AMC) hnuaia hna lakah thil felhlel, mimal induhsakna uchuak a awm ngeiin a hria a. A rang thei ang bera suta, dik taka hna la thin turin AMC hotute a ngen.
AMC Executive Council Meeting ni 11 September, 2024 a thukhawm chuan an hnuaia hna hrang hrang, Fixed Pay leh Contract Basis a lak nise a ti a. He Meeting thurel ang hian hna hrang hrangte hi advertisement tel lovin, an mi duhsak zawng an la ngei niin a lang a. Thalai lehkha thiam hna zawng mek tam tak awm karah, hetianga duhsak zawngte hnaa thun thawm hriat tur awm fo hi MZP chuan pawi a ti takzet a, a dodal tlat a ni.
AMC Executive Council Meeting chuan, Public Relations Officer-1, Project Assistant-2 leh Asst. Account Officer-1 te hi fixed pay a lak turin a rel a, lak fel tawh a ni. Heng bakah hian Consultat Geologist-5, Urban Animal Husbandry & Veterinary Officer-1 leh Junior Engineer-1 hi Contract basis a lak tura tih a ni bawk.
Heng hna hrang hrang, hlawh pawh ṭha tak takte hi, a duh apiangte tana dil theih turin advertisement chhuah a ni lova. MZP-in a chhui zelnaah phei chuan sawrkar phalna pawh an la lo nia hriat a ni bawk. Chuvangin, MZP General Headquarters Extended OB Meeting chuan, AMC hnuaia dik lo taka hna lak hi tun kar chhung ngeia sut turin AMC hotute a phût a. MZP ngenna in awmzia a neih loh chuan, zirlai hna zawng mekte thlavang hauh turin theih ang angin hma a la dawn a ni.
MZP chuan March ni 12, 2024 khan AMC hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeiin a hria a. Na takin a lo dodal tawh a. MZP ngenna angin AMC Executive Council Meeting ni 15 March, 2024 (Zirtawpni) a thukhawm chuan, AMC hnuaia hnalak hrang hrangte a sut (revoke) a. Ni 18 March, 2024 (Thawhṭanni) khan sutna lehkha (order) hi tihchhuah a ni ta a ni.
He hna sut tawhte hi tun hnaiah tharthawh leh niin, a mi ngai ṭhenkhatte thun nawn leh ngat an ni hian, tu emaw duhsak zawngte hnaa thun theihna tura ruahman a ti rinhlelhawm hle a ni.
Meeting chuan, sawrkar hna lakah a thiam leh tlingte chauh lak zel a duh a. Mimal induhsakna hmanga hnalak hi kalpui tawh lo turin Sawrkar hnuaia Department hrang hrang leh Agency-te a ngen nawn leh a ni.
MZP chuan vawiin ni 11 December, 2024 chawhnu dar 2 khan India hmarchhaka zirlai pawl dangte rualin, Citizenship Amendment Bill pass duh loh lantirna "Black Day" a hmang a. Flag dum zar a ni.
North East Students' Organisation (NESO) chuan CAB hi nasa takin a dodal a, chuti chungin kum 2019 December ni 11 khan he Bill hi pass luih a ni a. NESO chuan kumtin CAB pass a nih champhaphak December ni 11 hi "Black Day" tiin a puang a. Kumtin flag dum zarin hman thin a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: