Mizo Inchai-ah Lalsangliana'n hnehtu nei lo a nih zia a lantir!

Aizawl | Dec 12, 2024: Mahindra XUV3XO Mizo Inchai Title Fight 2024 chu nizan khan a tawp khar a ni a, Palian inchai-ah Lalsangliana'n hnehtu nei lo a nih zia a lantir!

December 9-11, 2024 chhunga LPS Arena, Falkland-a khelh Mahindra XUV3XO Mizo Inchai Title Fight 2024 a hmuhnawm hle a. A hmuna entu an tam bakah, TV lamah pawh entu an tam hle.

Nizan khan Mahindra XUV3XO Mizo Inchai Title Fight 2024 a tawp kharin khelh a ni a, Mizoram Wrestling Association President Pu Ngurthansanga chuan 'ruihhlo avanga Mizo thalaite buaina do let turin sports association hrang hrang a sawm a, dan hnuaiah tha taka inhmachhawna hmasawn zel turin inchai chakte a fuih. Mizo Inchai buatsaih nan sum hmuhna an nei lo va, cheng nuai riat vel seng ngai a nih laiin LPS Vision nen an thawh ho theih avangin lawmnthu a sawi.'

MIZO INCHAI TITLE FIGHT (PALIAN)

Lalsangliana (E & ND, Upper Republic, champion lai) bt Lalrinchhana Sailo (North Vanlaiphai)

= 66-0 (Thawh 10 an inchai)

* THAWH 1-NA : An fimkhur dun hle a, innawr tawn ringawt tlu miah lovin an tluan a, a inven nasat avangin Rinchhana point paihsak a ni. (Sangliana 1-0)

* THAWH 2-NA : Sangliana'n a chungnung zawk tih lantirin a nawr chhuak nghal. A hnuah zangthalin vawi li chhiar thleng a bawhbet a, Rinchhana tal chhuak mah se vawi 10 chhiang thleng Sangliana a bawhbet zui. (Sangliana 15-0)

* THAWH 3-NA : Sangliana'n tharumin a nuai hneh a, inven nan Rinchhana bawkkhup lai kuai zangthalin vawi nga chhiar thleng a bawh hnuah tal chhuak mah se vawi 10 chhiar thleng chiang takin a bawhbet zui leh. (Sangliana 15-0)

* THAWH 4-NA : Rinchhana'n bawhbet tuma tan a khawh apiangin a che sual zel a, Sangliana'n bawh fuh lehin vawi khat chhiar a nih hnuah lehlam a tal chhuak na a, a hnuah bawhkhup zawngin vawi 10 chhiar thleng a bawhbet thei. (Sangliana 11-0)

* THAWH 5-NA : Inven lmaha Rinchhana a insawrbing a, inchai boruak tla hniamin Sangliana'n a duh hun hunah a nawr chhuak thei emaw tih mai turin tum hnih a nawr chhuak a, Rinchhana'n lehlam nghawnga a man thin avangin point paihsak a tawk tel. (Sangliana 3-0)

* THAWH 6-NA : Sangliana'n vawi thum a nawr chhuak leh. (Sangliana 3-0)

* THAWH 7-NA : Sangliana'n vawi nga nawr chhuakin Chhanhima'n kawng engkima a el pha lo tih a chiang leh zual. (Sangliana 5-0)

* THAWH 8-NA : Sangliana'n vawi hnih a nawr chhuak hnuah a inven nasat avangin Chhanhima point paihsak a ni a. Sangliana'n man fuhin a kuai zangthal a, vawi thum chhiar thleng a bawhbet hnuah tal chhuak mah se tum thum a nawr chhuak zui leh. (Sangliana 8-0)

* THAWH 9-NA : Sangliana'n hahdam takin a khel a, lehlam invenna karah che sual tur khawpin a bei lo va, tum hnih a nawr chhuak leh. (Sangliana 2-0)

* THAWH 10-NA : Sangliana'n vawi hnih a nawr chhuak a, a khelh dan avangin Chhanhima point paihsak a ni tel bawk. (Sangliana 3-0)

LAWMMAN : 2014 atanga champion Sangliana'n kawnghren humhimin Rs 1,00,000 a dawng a, Palian title chuha a inchai tawh vawi liah chak vekin tun hi a bitum a bawhbeh hmasak ber a ni. Kg 97-a rit Chhanhima'n amah aia kg 24-a rit lakah point khat mah a thawk chhuak lo va, chuti chungin champion chotu a nih angin Rs 50,000 hlan a ni.

MIZO INCHAI TITLE FIGHT (NULIAN)

Lalhmangaihsangi (Dilkhan, Salem Veng, champion lai) bt Zodinpuii (Lunglei)

= Inbanphawiah Sangi a chak (Thawh 5 an inchai chhungin 11-11-in an inhnehtawk a, Thawh khat pek belhin point an hmu lo ve ve a, Inbanphawi hmangin a chak zawk chin fel a ni.)

* THAWH 1-NA : Zodini'n bul a tan tha a, a paih chhuak. Sangi'n bei letin a bawkkhupin a bawhbet hman teuh hle a, hun a tawpin a nang. (Zodini 1-0)

* THAWH 2-NA : Sangi'n ngam takin a nawr a, a kawihtluk hnuah Zodini'n bei letin a bawhkhupin vawi 10 chhiar thleng a bawhbet. (Zodini 10-0)

* THAWH 3-NA : Zodini'n tharum a nei a, mahse, nawr chhuah a tumna lamah a chu fuh lo va, Sangi'n la fuh dar lehlam betin vawi 10 chhiar thleng a bawhbet. (Zodini lamin Sangi'n a bawhbet dan an sawisel a, video ennawn a nih hnuah an hlawhtlin loh avangin point khat an hloh phah - Sangi 11-0)

* THAWH 4-NA : Zodini'n a nuai hneh zawk viau na a, amah aia kg 11-a rit zawk Sangi a nghet a, point awm lovin an tluan. (0-0)

* THAWH 5-NA : Zodini'n thahrui a nei viau a, point hmuh belh a tumna erawh a puitlin zo bik lo va, thingthia bawkkhupin Sangi a inveng. (0-0)

* THAWH 6-NA : Zodini'n nawr chhuah tum a tumna Sangi'n a dang thei a, Zodini a zuai hnuah a bawhbet let teuh hle a, tan hmun a siam rem hmain hun a tawp. (0-0)

* INBANPHAWI : Kut khing khat koki chungah, khing khat lehlam zak hnuaia rawlh ve vein an inkuahtawn a, inchawi kan tuma an inbeihnaah kut suih phelh hmasa Sangi a chak lo.

LAWMMAN : A vawi khat nan Sangi'n Nulian title a humhim a, champion lai a nih vangin Rs 50,000 hlan a ni. Point paihsak tawk lo se Thawh 5 an inchai chhunga chak thei Zodini'n title a hnaih hle a, Rs 30,000 a dawng.

FREESTYLE WRESTLING (EXHIBITION)

Dominic Zarzosanga (Serchhip) bt VLMS Dawngliama (Khelo India Kolasib)

= 5-0 (by fall classification point)

Lalchhanchhuaha (NRC RSC Aizawl) bt JH Zomuansanga (Khelo India Saitual)

= 4-0 (technical superiority)

Jony Lallawmkima (Saitual) bt Lalhruaitluanga (NRC Kolasib)

= 3-1 (classification point)

R Lalrinchhana (Serchhip) v Robert Laltlansanga (Melriat)

= 3-1 (classification point)

* Freestyle Wrestling (Exhibition)-a inchaiten Rs 2,500 vek an dawng.