Mamit leh Kolasib District tana inkalpawhna kawng pawimawh siam hna thawh mek enfiah

Aizawl | Dec 12, 2024: Mamit Bialtu MLA Er.H Lalzirliana chuan khawthlang lama inkalpawhna pawimawh tak Mamit to Bairabi kawng siam mek a hmunah a enfiah.

Short-term Maintenance Contract (STMC) hmanga hnathawh, Mamit to Bairabi kawng chhe zual lai siamthat mek niin, a khuar zual te siam rem a nih hnu in WBM(Lung) a hnawh mek a ni a.

Tunah hian pawisa Rs130 lakhs vel hman tawh niin, NH-6(spur) widening chungchang - DPR pawh siam mek ani a, December thla chhung a submit hman tum a ni. Land Aquisition ti turin CALA tur ruat a ni tawh a, Land Acquistion tih vat theihna atan hma lak mek anih thu SDO National Highway Division-I chuan MLA hi alo hrilh a ni.

A hmuna endiktu MLA Pu Mazira chuan he kawng hi a pawimawh thu leh a bikin Assam, Tripura atanga Mamit chakkhai lakluhna kawng pawimawh tak a nih avangte, he tlang dung a awmte tana Mamit an rawn kalna kawng pawimawh tak a nih bawk avangin tuna an hna thawh mek pawh chak zawk a thawk turin leh nakum furpui lo thleng leh tur pawh dawl zo thei tura siam turin thawktu te a chah a ni.

Mamit to Bairabi National Highway a nih theihna atan hian Mamit bialtu MLA Pu Mazira chuan 24th October 2021 khan MoRTH Secretary Mr. Giridhar Aramane IAS chu Delhi-ah zuk hmu in dilnate thehluh a ni a. Kum 2022 July ni 5 khan Mamit to Bairabi kawng chu National Highway thar NH-06 tura puan a lo ni ta a ni.

MLA hi MNF Mamit Centre Block hruaitute leh SDO National Highway Division-I ten an tawiawm a ni.