Aizawl | December 13, 2024: Vawiin khan Mizo Hnam Run chhung inkhawm hun hnihnaah MNF Senior Vice President Dr R Lalthangliana chuan Pathian leh mipui zarah MNF a sorkar leh hunah ration buhfai man a let thawka to leh, uchuak taka oil man tih to-te chu mipui phurrit chhawk zangkhai thei tura a man ennawn leh tur anih thu sawiin, health care pawh changtlung taka kalpui leh an tum thu a sawi.
"Chhiahhhiah tipung ve lo tura insawi leh mipui phurrit siam ve lo tura insawi ZPM sorkar tharin ration buhfai man a let thawka tipungin, oil man uchuak takin a tipung a, Pathian leh mipui zarah MNF a sorkar leh hunah mipui phurrit chhawk zangkhai thei turin kan ennawn leh ang," a ti.
Health Minister hlui Dr R Lalthangliana chuan, "MNF sorkar khan sorkar tirh atanga kum khat pawh tlingloah Health care changtlung tak kalpui turin hma kan la nghal a, Vanapa Hall-ah a hawnna kan nei a. Covid hrileng karah pawh Universal Health care kalpui turin Health Minister ka nih ang khan central finance ministry-ah nasa takin ka nawr a, screening committee kaltlangin ADB atangin cheng vbc 1000 min approved sak a, MLA election hnaih avangin kan bawhzui hman ta lo a. ZPM sorkar tharin a ngaihna a hriat loh vang nge, a zir chian loh vang, a hlawhchhampui ta mai hi pawi ka ti a, sorkar tan thil zahthlak tawp khawk a ni. Kan sorkar leh chuan changtlung leh tha zawkin kan kalpui ang," a ti.
MNF Senior Vice President chuan, "Sorkar laipuiin Myanmar ramri 1643 km-a thui Border Road Organization (BRO) in kum 10 chhunga hung fel tura hma a rawn la chho thar leh hi MNF chuan kan dem tak zet a ni. Tuna kan rorel lai ZPM sorkar hian engtin nge a tih dawn ? Kan unaute nen kan inkar Central-in hung luih a tum hi kan dem hle a. Tuna kan sorkar hrawn mek ZPM sorkar hian Central BJP sorkar hi a dodal zel ngam dawn em ? Nge a mawiah a do ve chauh ? A do ngam tak tak anih chuan a rang lama hma la ngei turin kan phut tlat a ni," a ti a.
"Free Movement Regime-in a tum chu kan inkal pawh theih loh nana ramri hung a ni. FMR hi NDA sorkarin a siam a, a thiat leh bawk. FMR awm hma daih hian Burma constitutiin-ah kum 1948-ah 40 km inkalpawh theih tih an lo dah tawh a. Chumi zulzui chuan kum 1950-ah India constitution-ah dah a ni leh bawk. Fencing hian chu dan hmanga inkalpawh theihna chu a tihbuai dawn avangin kan duhlo tlang a, ramri hung tura hmalakna hi na takin kan do a ni. Manipur-ah pawh fencing hi thui tak an ti thei bik chuang lo," a ti bawk.
Dr.R.Lalthangliana chuan ZPM sorkar tharah hmasawnna hnathawh mumal sawi tur an neih loh avanga inhlawhfa leh sumdawng thlengin pawisa vang an tih thu te, stamp duty thlenga a man an tihpun thu te, kan economy a tlakchhiatzia thu te a sawi a. Central sorkarin state dang project lian an approved mawl mawlh laiin Mizoram tan approved sawi tur a awm mang lo a, sanction phei chu sawi tur awm lo tluk anih thu a sawi bawk.
He hun hi Pu Lalchamliana NCC,MNF Gen.Hqrs.chuan kaihruaiin, Pu PC.Chuangkima NEM, MNF Gen.Hqrs.chuan hunserh a hmang.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: