Corruption na taka do a nih theih nan Mizoram Lokayukta thuam chak leh thuneihna sang zawk pe turin hma kan la ang

Aizawl | December 10, 2024: Mizoram Pradesh Congress Committee chuan vawiin khan Vanapa Hall-ah Special Assembly hlawhtling takin an hmang a, He hunah hian MPCC President Lal Thanzara chuan thu sawiin, “Indian National Congress hi India Independence tharum thawh lova sualchhuaktu a ni a, Indian Constitution duangchhuaktu a ni bawk. Mizoram mipuite rilru mangang leh thlabar reng renga awm thinte chuan Congress zarah remna leh muanna kan lo nei ta a, Central-a Congress party sawrkar chuan UT atangin State puitlingah min hlangkai bawk a ni." a ti.

Special Assembly chuan, "Corruption na taka do a nih theih nan Mizoram Lokayukta thuam chak leh thuneihna sang zawk pe turin hma kan la ang," tiin resolution an pass a ni.

“Congress hian kan ramah ro an rel rei ber a, Development pawh Mizoram tan an thlen hnem ber a ni. Heng kan ram rohlu Airport te, Medical College te, Thenzawl Horticulture College leh Sports Infrastructure hrang hrangte hi Congress sawrkar hun laia thawh a ni.

“Congress sawrkar khan miretheite hlim leh thlamuang taka an awm a duh ber thin. Kum 1990 chhovah khan mirethei rangva inchung nei pha lo tam takte tan Rangva inchung tur kan sem a, 1993 ah NLUP cheng singthum (30,000) in chhungkaw 41,000 hnenah bultanna tur kan sem leh a ni. MNF in kum 1998 leh 2008 inkara ro an rel chhung khan MIP an kalpui ve a, a hlawhtlinna hmuh tur a awm lo. Kum 2008 atanga 2018 inkarah khan Congress sawrkar chuan NLUP kan kalpui leh a, chhungkaw 1,31,940 hnenah pek a ni. NLUP vang hian arsa, vawksa, bawngsa, bawnghnute, sangha, buh leh thlai, artui etc. thar chhuah nasa takin a pung a. Khawl chi hrang hrang, industry a hman tur leh lei lehna khawl thlengin kan sem a ni.

New Economic Development Policy hnuaiah thalaite bultanna kailawn, Startup scheme bultan a ni a, vawiin thlengin thalaiten an hmang tangkai em em a ni. Vawiina Mizoram lo ṭhang chho zel pawh hi khami hun laia kan hnathawh zar kha a ni. Hengte avang hian pawisa leng vak a tam a, Bank tam tak Aizawl khawpuiah an rawn lut a, chawhmeh zuar leh sumdawngte pawhin nuam an ti a ni.

“Congress party-in sum enkawl kan thiam ber a, kan sawrkar lai apiangin mipui an hlim a, sawrkar hnathawkte sum leh paiah kan hrek ngai lo. Tunah chuan sawrkarin sum enkawl a thiam loh rah a lang a, pawisa lengvak a tlem ta a, tunlaia thlai zuar leh sumdawngte titi ber a ni.

“Tuna ZPM sawrkar kan hrawn mek hi an insawi angin an kal lova, inrenchemna kalpui anga insawi in tul lovah hna an siambelh avangin vaibelchhe sawm tel an senbelh mek a ni. MLA Fund te tul lovah an tisang a, kum tin vaibelchhe 80 lai an seng dawn a ni. An Flagship Programme te hi anmahni duanchhuah ani lova, central scheme awmsa a ni.

Hand Holding Scheme te hi mi nawlpui, lehkhathiam lo leh pianphunga rualban lo te tan chuan tum chhin chi pawh a ni meuh lo. Thiamna neih ngai, project siam ngai a ni zel a ni.

“Tuna VC inthlan an sawn hma pawh hi mipui kutthlakna zah lohna nasa tak a ni a, Democracy palzutna a ni. Mipui rilruah an hniam tial tial a, sawhthing hralhna tha an hmu dawnin a lang si lova, rulling VC neih tlem an hlau si a, heti hian an che ta niin a lang.

“An enkawl mipuite oil man leh chhiah te, buhfai man te min tihsan khum a, an ni hlawh leh hamthatna hrang hrangin an inhaivur leh si a.

“Kum 2028 inthlanah Pathian leh mipuite zara Congress party kan sawrkar leh anih chuan oil, buhfai leh chhiah uchuak taka an tihsan hi kan ennawn leh vek dawn a, Economic chhanchhuahna programe rintlak- NLUP hi, mithiam zawkte râwnin changtlung zawkin kan kalpui leh ngei dawn tih ka puang e.” a ti.

He Special Assembly hi Sr Vice President Pu Lalnunmawia Chuaungo chuan a kaihruai a, Rev. R Lallianpara’n hunserh a hmang a, Pu C. Chawngkunga Ex-Minister, General Secretary chuan Congress party member boral tate sunna hun a kaihruai a, Pu H. Rohluna Ex-Minister, General Secretary i/c GAD chuan report ngaihnawm tak a pe bawk. Chawhnu lamah Pu lal Thanzara, President chuan rorel a kaihruai a, Resolution Pu Lalrinmawia Ralte Ex-Minister kaihruaina in pass a ni bawk a ni.

MIZORAM PRADESH CONGRESS COMMITTEE SPECIAL ASSEMBLY

DECEMBER 10, 2024

VANAPA HALL

OFFICIAL RESOLUTION

1. Kan ram leh mipuite kaihruai turin thinlung taka Pathian tih mi hruaitu kan mamawh ber tih Congress Party chuan kan pawm a. Kan ram leh mipuite hruai turin Pu Lal Thanzara, MPCC President hi kan ring tawk a, Mizoram Congress member ten kan thlawp tlat zel dawn a ni.

2. India rama keini ang hnam tlem leh hnufual zawkte humhima kan awm nan leh hmasawnna kailawna kan kai ve theihna tura ruahmanna tluantling siama, India Danpui (Constitution) a dahtu leh chumi vawnghim tura rintlak awm chhun Political Party chu Indian National Congress hi a ni tih kan hria a. Kan Ram, kan Hnam leh kan Sakhaw him nan Central Sawrkara a fawng chelhtu a nih leh ngei nan theihtawp kan chhuah zel ang.

3. Kan Ram leh Mipuite hmasawnna kawnga chak taka kan kal theih nan Rorelna Dik leh Rorelna Tha kan ramin a mamawh tih Congress Party chuan kan pawm a; Rorelna Dik leh Ṭha tungding turin theihtawp chhuahin hma kan la zel ang.

4. Mizoram Mipui ten pheikhai rual taka hmasawnna kawng kan zawh theih nan kuthnathawktu leh mahni thiam thil hmanga eizawng ten eizawnna hlawk leh ngelnghet an neih a tulin, chu chu kan ngaih pawimawh hmasak tur a ni tih Congress Party chuan kan puang a. Chumi atan chuan NLUP changtlung zawk leh Tang Puihna kaikawpin ruahmanna tha leh changtlung kan siam ang.

5. Kan Ram leh kan Hnanin hmasawnna tluantling a neih theih nan leh chhungkaw tinin nuam taka nun kan hman theih nan mipui ten hriselna tha leh inenkawlna (health care) tha kan mamawh tih Congress Party chuan kan pawm a. Hriselna tha zawk leh inenkawlna (health care) tha zawk kan neih theih nan ruahmanna tha kan siam ang.

6. Kan ram leh hnamin hmasawnna tluantling a neih theih nan kan tu leh fate mi puitling leh rintlak, mahni ke a ding theia kan chherchhuah a ngai tih Congress party chuan kan pawm a. Chumi tana chuan zirna (education) tha kan mamawh a, kan tu leh faten zirna tha an neih theih nan Education Reforms changtlung tak kan duang ang.

7. Hmasawnna hna thawk turin a hlawkna teltu tur (direct stakeholder) te an tha ber tih Congress Party chuan kan pawm a. Khawtlang/Veng chhung enkawlna leh hmasawnna hna dik taka a nih dan tur taka thawh a nih theih nan khawtlang mipuite kuta thuneihna sang tak leh mawhphurhna sang tak dah turin Village Council leh Local Council Reforms changtlung tak kan duang ang.

8. Kan ram hmasawnna daltu lian ber pakhat chu hlemhletna (corruption) a ni tih kan pawm a. Corruption na taka do a nih theih nan Mizoram Lokayukta thuam chak leh thuneihna sang zawk pe turin hma kan la ang.