Sports Minister-in Propanja Mizoram Mega Match neih tur chungchanga Sawrkar hmalakna a sawifiah

Aizawl | December 10, 2024: Vawiin chawhnu dar 1:00 khan Sports & Youth Services Minister Pu Lalnghinglova Hmar chuan a Office Chamber, MINECO, Khatlaah Chanchinbumite leh Mizoram Arm Wrestling Association (MAWA) hotute chu kawmin Propanja Mizoram Mega Match chungchanga sawrkar hmalakna a sawifiah.

Sports Minister Pu Lalnghinglova Hmar chuan Propanja Mizoram Mega Match chu Mizorama Armwrestling lam tuite tana remchanna lian tak inhawng tur a nih thu sawiin, Mizo thalaite chu an tuina zawng apiangah ruihhlo tel lovin hlim taka kal thei an nih zia lantirna tur a nih thu a sawi bawk a ni.

Inkawmhona hunah hian Pu Mark Lalthanliana, Joint Secretary, Sports & Youth Services Department chuan Sawrkar lam atanga Propanja kaihhnawiha hmalaknate report pein, Pu H. Lalhmingthanga, Director, SYS pawhin Propanja lam nena an thawhho dan report tlangpui a pe nghal bawk a ni.

Propanja League 2024 hi Tourism Department-in kumin December ni 13 atanga an buatsaih tur Winter Festival peng pakhat anga Propanja lamte nen tangkawpa Mizoram Sawrkarin a huaihawt tur a ni a. December ni 17 zana neih tur Propanja League-ah hian MAWA member-te zing atanga thlan chhuah mi pangate leh Mizoram leh India ram pawn lam atanga Kutbuanchak (Armwrestler) lokalte chu an intum dawn a ni. League hi a duh apiangte tan chhim theih a ni ang a, en man hranpa a awm dawn lo a ni. Hemi hunah hian tunlaia Armwrestler lar tak Denic Lalruattluanga bakah, MAWA member dang tha tak takte pawh an inlan nual dawn a ni.