Aizawl | December 10, 2024: Vawiina ZPM Zonu General Headquarters in Advance Christmas, Ransam CK Resort a an hmanna ah, he hun hmapuitu Pu Lalduhoma Chief Minister chuan, Kalphung thar mipui Sorkarin Banakaih (Handholding) policy hmanga mipuite rilru puthmang siam that an tum thu a sawi.
Chief Minister Pu Lalduhoma chuan,"Hun rei tak chhung Sem policy hmangin kan ram hi kaihhruai a lo ni tawh thina, chuchuan kawng tam takin mipuite rilru puthmang a dik lo zawngin a hruai nasa hle a ni, sem policy khan mi tam tak kutdawh rilru a put tira, chu chuan kan ram mipuite hmasawnna tur a tithuanawm nasa hle a ni. Kalphung thar mipui Sorkar erawh chuan Sem Policy ni lovin Thawhrimna kan zuara, Bana kaih handholding Policy hmangin mipui rilru puthmang siam that kan tum mek a ni," a ti.
Chief Minister chuan,"Bana kaih Hanholding Policy hnuaiah Entrepreneurship Hanholding, Chief Minister Special Pakage leh Thlaithar lei kalpuiin hma kan la mek a, hengte hi ruahmana felfai tak leh kalphung mumal tak hnuaiah lo chuan thil tih theih a ni lova, Thlaithar lei chungchanga ruahmanna kan siamte pawh mipuiten lo ngaihvena, thawhrim rah duhawm tak seng turin kuthnathawktute duhsakna kan hlan a ni," a ti.
Chief Minister chuan,"ZPM Party chu party naupangte nimahse Opposition nih lai atang tawhin beihrawn kan hlawh hle a, Sorkarna kan chan hnuah pawh thudik tawk lo hmanga beih chhunzawm kan la ni renga, mipui tana thudik hriat hleih theih loh khawpin beihna kan tawk fo a ni. Heng min beihnate lo sepui ruahtawrh ngawt mai hi a fuh ber lova, mipui hnena thudik kan puanchhuah ve fo a tul a ni. Min beitute hian dawt pawh an hmang hreh lo a, chuvangin thudik puanchhuah kawngah hian tan kan lak a tul hle a ni," a ti.
Pu Lalduhoma Chief Minister chuan,"Kalphungthar mipui Sorkar a lo pian theih nan zonu te hian tha an thawh hnem hlein ka hria a, Hmeichhiate hawilam a piang hi chhungkua, khawtlang leh rampumin kan hawi lam a ni thin a, chuvangin vawiina kan sorkarah hian zonute hian hmun pawimawh tak an changin ka hria a, tin kan ram hmasawnna ah pawh hian Zonu/hmeichhiate hian kawng tam takin mawh an phura, inchhung khur leh pasal fanau enkawl kawngah pawh nasa taka tan la zelturin ka beisei a ni," a ti.
He hun hi Pi R.Lalawmpuii Zonu Gen.Hqrs in a kaihruaia, Pi Catherene Sangzuali Adviser in hunserh a hmang a, Samson Lalhunruata Youth Icon Top 5, 2024 hnen atang zai ngaihthlak a ni bawk. He hunah hian Pu Lalthazuala Rawite, MAMCO Chairman bakah ZPM General Headquarters hruaitu Er. Vanlalneiha Secretary General, Pu R.Lalhmunsiama GS i\c Frontal, Pu TBC Lalthanmawia GS leh Zoramsangzela Secy ten an tawiawm a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: