ZORAM MIPUI KUMPUAN – ENCHHINTUTE INCHHIR KUM: MNF Treasurer Lalruatkima

Aizawl | November 18, 2024: Vawiin ni 18, November, 2024 Thawhtanni hian Mizo Hnam Run chhung inkhawm neih a ni a. Hun hnihna - political session-a thusawitu Pu Lalruatkima, MNF Treasurer & Ex-Minister chuan kalphung thar sorkarin mipuite beisei a phak loh avangin Zoram mipuite kumpuan chu inchhir kum a ni ber, a ti.

Pu Lalruatkima chuan kan ramin zalenna famkim a neihna tura kan hnam pasalthate leh martarte zahna chibai kan buk nawn leh a ni, tiin, "Ram leh hnam tana nunna hlu tak thapa, in inpekna chu Zofate thinlungah a nung reng dawn," a ti a. Sinlung Hills Council Election 2024-ah MNF & HPC(R)-ten sorkar thar an siamah duhsakna chibai a buk tih a sawi.

MNF tobul sawiin, "Kan ram, kan hnam, kan sakhua a him theihna tura beih te, thendarha awm Zofate zalenna tur te, hnam anga kan dam khawchhuahna tur te, Zofate luah chin kan humhim zelna tura hnam pasaltha leh martarte sulhnu hnutchhiah leh  meichher chhit hi a mih mai lohna turin thangtharten an hniak hnung kan rawn zui zel dawn a ni. 

MNF sorkar kaltaa Zoram, hnam leh sakhaw dinhmun sawiin, “March 8, 2018-a Bairabi Zophaia Zofate Chawlhbuk saa hnatlang zirlaite leh media-te Assam Police-ten kut an thlak a, chhantu an nei lote kha kan la theih nghilh lo. Covid hripui karah Assam Police-ten July 26, 2021-a Vairengte dai an rawn run khan ram neitu sorkar chuan huaisen takin kan hum a, kan la luah chhunzawm thei zel a ni.

“MNF chu hnam party a nih angin zohnahthlak hmun hrang hranga awmte insuihkhawm lehna turin hmalak a ni a - Jampui (Tripura), Shillong (Meghalaya) leh Lamka (Manipur)-ah Zofate Insuihkhawmna ‘Zo Kutpui/Festival’ buatsaih a ni.

“Kum 23 chhung Bru refugee-te harsatna - special polling booth buatsaih ngai thin chu MNF sorkar hnuaiah January 16, 2023 khan Central sorkar leh Tripura Bru Refugee Camp aiawhten ‘inremnna thuthlung’ an ziak a, election apianga harsatna lian tak kan tawh thin chu a bo ta a. Mizoram eroll-a chuangte paih vek an nih kha.

“Mizoram - Assam - Cachar boundary chungchangah ngaihdan mumal kan neih theih nan Council of Ministers thukhawm chuan BEFR Act 1875 pawmin thutlukna a siam a. Dy. CM kaihhruaina hnuaah Mizoram Boundary Commiteee dinin, political party & NGO-te nen lungrual takin kan ram leh hnam tan hmalak zel a ni.”

Pu Lalruatkima chuan tunhnaiah Manipur-a kan unauten tunhnaiah harsatna nasa zawk an tuar a. MNF sorkar laia an thlamuan ang khan ZPM sorkarah hian an thlamuang meuh em? a ti a. Election dawna an auhla - _ralkhat atanga kut kuang kuah thlir ngawt kan tlin ve lo ang_ tih te, _Mizoram sorkar hmel an hmu thuai ang_ ti tein an inhrosa kha a nia. Kan unaute thlavang hauhna kawngah kan sorkar chu Thereng vuak thlak angin an reh vang vang a nih hi, a ti.

Kalphung thar chu inbumna leh intihderna mai a lo ni zo ta tiin, MNF Treasurer chuan, “Campaign laia an thusawi loh ang hlirin ram an kaihhruai a, mipui kan beidawng a, a chang leh kan nuih a za, kan thinrim a nih hi. Dawt ngialngan sawi hrat CM kan nei hi kan vanduaina tizualtu a ni.

“Sinlung Hills Election 2024 inthlanah mipui ngaihzawn an ni lo a, hlawhtlinna an chang zo lo. Kalphung thar sorkara kan beiseina zawng zawng chu thuneihna duh luat vanga vote zawnna mai a lo ni tih mipuiin kan hmu chho mek a, inbumna leh intihdernaah mipuiten kan ngai zo ta a. An campaign au hla – ‘Enchhin’ tih chu ‘Inchhir’ ah a lo chang zo ta.

“Kumpuan nei ta ila – Kum 2024 hi 'enchhin' aiah 'inchhir kum' tih ni se. Kum 2025-ah pawh inchhir kum. Kum 2026 leh 2027-ah pawh ‘Inchhir Kum’ a ni ang a. Kum 2028 chu inchhir avangin “Inlamlet Kum’ a ni ve thung ang,” tiin ZPM sorkara mipuite beidawn mek thu a sawi.

Ex-Minister Pu RK-a chuan Maumual House Site Plan 1987 chungchang a sawifiah a. Kum 2022-ah revision neih a ni a. Plot siam zat – 737, pass pek chhuah – 720, MNF returnee hnena pek – 653 bakah road alignment a sut buai avanga plot tawh sa, issue tawh 17 a awm. Housing complex changtlung, kawngpuiin a pawh vek theih tura siam a ni a. Valid pass neitute hnenah a thara pass pek leh tura hmalak mek a nih laiin model code of conduct avangin a khawtlai ta a ni, tiin Plan Revision Phase-II atan sum dil a ni a, tihfel hman a ni ta lo, a ti.

ZPM sorkar chu sorkar hnathawkte nek cheptu, aikal lak khap, office tan hun leh ban hmaa chhuahsan phal lo leh an awmna chin hriat theihna app an hmang tan dawn. Sorkar hnathawkte an beidawng mek a, MNF sorkar leh hun an nghakhlel hle. Kan ram, kan hnam leh sakhua a him theihna turin hmalam panin i bei zel ang u, Pu RK-a chuan a ti.

Inkhawm hi Pu R. Lalthansanga, Adviser MNF GHQ-in a kaihruai a, Pu Isak Malsawmtluanga, Secretary MNF GHQ-in hunserh a hmang a. Pu J. Lalremruata, GS MNF GHQ-in November 15, 2024-a Lamka-a Pu Laldenga hriatrengna lungphun hawn a nih dan leh Manipur zin report a pe bawk a ni.

.