HLAUHNA AIIN RINNA THLANG RAWH

_I Nun Kal zel Atana Pathian Hmathlir_

*HLAUHNA AIIN RINNA THLANG RAWH*

By Rick Warren 

— Nov 19, 2024

“Rinnain lal thinurna chu hlau lovin Aigupta ram a kalsan a, hmuh theih lova chu a hmuh avangin a tuar ṭan ṭan a ni.” Hebrai 11:27

Mosia khan a nun hman dan tur kha amah ngeiin a thlang a, chutiang chiah chuan i nunah pawh a pawimawh a ni. Mosian thutlukna a siam pakhat chu: Hlauhna ai chuan rinnaa nun a thlang a ni.

Chu duhthlanna tho chu i hmaah chhawp chhuahin a awm a. Rinnaa nun nge hlau chunga nun chu i thlan dawn?

  

Bible chuan Hebrai 11:27 ah, “Rinnain lal thinurna chu hlau lovin Aigupta ram a kalsan a, hmuh theih lova chu a hmuh avangin a tuar ṭan ṭan a ni.” 

Mosia chuan a hunlaia khawvela thiltithei ber hnenah kalin heti hian a hrilh a, “Heng salte, pyramid satute hi i hmu em? Ka hruai dawn. Kan chhuak vek dawn. Sal chhawr tur i nei tawh lo vang. Ka mite kaltir rawh.”

Mosian hlau duh se hlauhna chhan tur a ngah mai; khawvela thiltithei ber hmaah a ding tlat a ni. Chung hunlai chuan Pharoah chu pathianah an ngai a, a sawi apiang chu dan a ni zel.

Mosian hetiang hian a han chhang ngam a nih chu, “I thupek hi kan zawm tawh dawn lo. I aia thunei zawk hnenah ka thlen tawh che avangin ka hlau lo che.” A ti hmiah ngam a ni.   

I nuna hlauhnate i hneh theihna turin chutiang rinna chu i nei duh em? Pathian i hnaih poh leh huaisenna i nei ang. Pathian i hlat poh leh hlauhna i neih belh zel ang. 

I nun kal zel tur atana rinna pawimawhzia hi sawi uar lutuk a awm thei lo vang. Bible chuan heti hian a ti, “Engpawh rinna lova tih chu sual a ni si a.” Rom 14:23

Tunkar chhung hian sual engzatnge i khawih tawh? Vawi tam a ni. Rinna tel lo va ka tih apiang - ringhlel chunga ka tih apiang chu - sual a ni.

Bible pawhin hetiang hian a sawi, “Rinna lovin ama lawmzawng mi nih rual a ni lo.” (Hebrai 11:6). Tunkar chhung hian vawi engzat nge Pathian i tih lawm tawh le?

I nunah thlak danglam duh i nei em? Phunnawi bansan la rinnain bul ṭan rawh. Phunnawina chuan Pathian a ti che lo. Pathian chu rinnain a ti che thin. “In rin angin in chungah thleng rawh se,” a ti a. (Matthaia 9:29). Rinna chuan i chunga Pathian hnathawh hi nasa takin awmzia a nei thei a ni. 

Hei hi a ni a kawng chu: I rinna len leh tet ai chuan Pathian len leh tet hi a pawimawh zawk. Rinna tlemte pawhin Pathian ropui takah chuan rah ropui tak a chhuah thei!  

Ngaihtuah zui atan

* Engtin nge hlauhna chuan i tana tha ber tur Pathian i thlannaah dal che?

* Mi rinnaa khat a nih chuan a pawnlam landanah engtin nge a lan?

* Pathian i hnaih chuan rinnain ilo khat ve ang. Pathian hnaih kawngah leh rinnaa kawngah i than theihna turin engnge i tih ang? 

*[Lettu: Sangpuia]*