"Rilru hriselna leh Pathian thu a inzawm"

Aizawl | November 25, 2024: Vawiin ni 25, November, 2024 (Thawhtanni) hian Mizo Hnam Runah chhung inkhawm neih a ni a, hun hnihnaah Professor Zoengpari, Head of Department, Psychology, MZU chuan rilru hriselna leh Pathian thu a inzawm tlat thu a sawi.

Prof.Zoengpari chuan mihring rilru reng reng hi a hrisel a pawimawh thu sawiin, a lang a pauva tha tak anga lang, chhung ril lam kha si, beisei leh duhdan ang ni lo engemaw a lo thlen changa buai phili chung, midang mawhpuh tur zawng reng mi a awm theih a. Retheihna, harsatna leh lungngaihna a lo thlen changin indawmkun mai lo a, hahdam zawk leh a eng zawnga thlir thiam thinte hi mi rilru hrisel an ni, a ti.

"Politics-ah pawh duh dan anga thil a lo thlen loh changa thil thleng hmachhawn thiam chu rilru hrisel neite an ni, kum upat deuh avangin rilru hrisello chuan hma lam kawngah beiseina an nei lo a, an beidawng a, rilru hriselte chuan an upat deuh pawhin hlim taka hmachhawn dan an thiam thin. Sum ngainatna leh hlemhletnate hi mahni theuhah inteh chhin i la; miin min ngaihdan leh min teh dante hi a pawimawh zawk tih hriat reng tur. Ka hlawhtling a, ka hausa tho tih avanga mite venthawn loh hi thil thalo leh rilru hrisello tak a ni," a ti.

Prof.Zoengpari chuan hmeichhe dinhmun sawiin, mimal angin rilru hriselna hi teh theih a ni a, rilruin scale hmang chhin u la, thinrimna te, mi huatna leh itsiknate hi teh ta i la, a lo san viau chuan insiamrem zir tur a ni. Sum enkawl chungchangah hmeichhiate mawhphurhna a sang hle a, sum lakluh mila hman daihzai thiam a ngai a, hei hian kan tu leh fate hma hun a hril thui viau a ni. Kan tu leh fate hi tun laiah an intichangkang tawh a, an rilrute a danglam tawh a, nu leh pa, an pi leh pute hi ni khatah vawi khat tal koh tir ngei ngei hi inlaichinna tha tak siamthatu a ni, a ti bawk.

Inkhawm hi Pi Lalhmangaihzuali Gen.Secretary, MNWF chuan kaihruaiin, Pi Lalvurthangi EM, MNWF chuan hunserh a hmang a, Malsawmzuali Ngente chuan zaiin kalkhawmte a awi.