N Chawnpui Branch YMA Golden Jubilee lawm

N Chawnpui | November 15, 2024: N Chawnpui Branch YMA chuan vawiin khan Golden Jubilee chu North Chawnpui Community Hall-ah an hmang a. Serlui Bialtu MLA Pu Lalrinsanga Ralte-in khuallian niin Jubilee pual a lungphun a hawng a, Central YMA Asst. Secretary Pu Fabian Lalfakawma chu khualzahawm a ni a, Kolasib DC Pu Robert C Lalhmangaiha chu uaptu a ni. N Chawnpui Branch YMA Golden Jubilee lawmna hi N Chawnpui Branch YMA Golden Jubilee Organising Committee Vice Chairman Pu Lalnunmawia Pautu-in a kaihruai a ni.

Khuallian Pu Pu Lalrinsanga Ralte chuan YMA member leh mipui kal khawmte chu Golden Jubilee chibai bukin North Chawnpui Branch YMA Golden Jubilee lawmpuina atan hian North Chawnpui khuaa mi harsa leh rethei, inhmun leina neilo chhungkaw engemawzat te tana inhmun theh tur a leisak chu N.Chawnpui VCP hnenah a hlan nghal a. In 30 tal sak theihna tura ngaih a ni.

MLA chuan, Hnam dangin an neih ve loh, mi nawlpui tel theihna pawl, ram leh hnam humhalh kawnga theih tawp chhuah ṭhin YMA kan nei hi Mizote kan vanneihna a ni, a ti a. "Pathianin ram min pek humhalh chu a chhunga chengte mawhphurhna a ni," tiin, a bik takin ṭhalai leh zirlaite chu zirna leh thiamna hmanga ram la a, ram leh hnam tan theih tawpa ṭang zel turin a chah.

Khuallian chuan, ṭhalai kalkhawmte chu zirna lamah ṭang lehzual turin a chah a, ram leh hnam tana theihtawp chhuaha sorkar hna pawimawh chelh tur chher chhuak tura bei zel turin a chah bawk.

Khualzahawm Pu Fabian Lalfakawma pawhin thu sawiin, mi harsa leh chhumchhia zawkte tana ding ṭhin tana lawmna ni buatsaih a nih chu lawmawm a tih thu sawiin, ram leh hnam humhalh tura theihtawp chhuah zel turin mipui kalkhawmte a sawm a. "Kan ngam chinah Pathianin min pui ṭhin a, tlanchhiate ko letin a pui ngai lo!" a ti a, ram leh hnam tana ṭhalai huaisente inpekna fakawm a tih thu a sawi bawk.

"Mizote chu hnam taima kan ni a, a hlawk leh ṭha tih kan hriatah chuan inṭamchhuah khawpin kan taima zel," a ti a, "tih a manhla a ni tih kan hriatah chuan, khap ngai khawpin kan bawh fo ṭhin," a ti bawk.

CYMA Assistant General Secretary hian, N chawnpui Golden Jubilee Souvenir, 'Chawnpui Par leh Ser Lui' a tlangzarh bawk a ni.

North Chawnpui Branch YMA Golden Jubilee lawmna-ah hian Upa P Rokima chuan hunserh a hmang a. N Chawnpui VCP leh Organising Chairman ni bawk Pu Dennis Rothangmawia'n thu a sawi bawk.

He hunah hian, N Chawnpui Branch YMA hruaitu lo ni tawhte chawimawina hlan a ni a, hruaitu hlui mual liam tawhte sunna hun hman a ni bawk.

Tlaiah khawtlang huap Golden Jubilee lawmna ruai ropui takin an ṭheh a. Zanah Jubilee pual concert an nei dawn bawk a ni.

N.Chawnpui Branch YMA hi kum 1974, October ni 15 ah din niin, remchan zawkna avangin vawiinah Golden Jubilee lawmna hun hi hman a ni. N Chawnpui-ah hian tun dinhmunah YMA Member 220 an awm mek a, mipa 125 niin, hmeichhia 95 an ni.

Golden Jubilee lawmna mei det hi November 13 zan khan neih a lo ni tawh a, N Chawnpuia upa ber Pu Khualliana'n Jubilee mei a det m a. Nimin, November 14 khan chhun lamah infiamna hrang hrang hmangin Jubilee an lo lawm tawh a, nizan khan vantlang inkhawmin a lawmna hun hman a lo ni tawh bawk.