Aizawl | November 16, 2024: Vawiin ni 16 November, 2024 (inrinni) chawhma dar 11:00 khan MZP General Headquarters chuan MZP Conference Hall-ah tun hnaia Manipur a kan unau mi 10 te Central Reserve Police Force(CRPF) ten Jiribam District-a an kah hlum leh a hnu lam thil kal zel chungchangah Emergency meeting a ko a. Meeting hi President Pu H. Lalthianghlima'n a kaihruai.
Meeting chuan, he thil thleng leh a hnu lam thil kal zel; post-mortem tih khawtlai, chumi hnua an ruang pek chhuah tih khawtlai a, Zofate duh dan ngai pawimawh miah lo a helicopter-a ruang han dah tura Manipur state leh India sawrkar hmalakna hi a lawmawm loh hle in a hria a, an kah hlum tawh hnuah pawh kan duh anga ruang pawh kan buaipui a rem lo hi MZP chu a lungawi lo tak zet a ni.
Mizoram mipui lungawi loh leh thinrimna inmung mek ngaihtuahin, Meitei tan hian tute emaw insum zo lo kut tawrh mai theihna MZP chuan a awm niin a hria a, MZP chuan, Mizoram sawrkar chu Meitei te sahimna ngaihtuah turin a ngen a, Mizoram chhunga Meitei awm te pawh fimkhur turin a chah a ni.
Hetih rual hian, Manipur state khawpui Imphal-ah pawh Mizoram atanga lehkha zir a awm te’n Meitei kut an tawrh loh nana hma la turin MZP chuan India sawrkar a phut a ni. MZP chuan Manipur sawrkar hi a ring lo a, Mizoram atanga zirlaite himna chungchangah pawh Manipur ni lova India sawrkar hmalakna hi a beiseiin a phut tlat a ni. Mizoram atanga Imphal-a zirlai awmte himna atana hmalak a nih loh a, tuar an awm a nih chuan MZP chuan a ngai thutak hle ang.
Tin, kan unaute buainaah hian Mizoram hi a ralbang thei ngai dawn lo va, chuvangin Manipur sawrkarin Meitei firfiakte a khuahkhirh theih hma chu an state-a science leh technical institution hrang hranga Mizoram seat-te hi institution dangah behtir rih turin MZP chuan India sawrkar hi a phutin a ngen nghal bawk a ni.
Manipur-a Zofate tawrhna hi MZP chuan a hriain a ngaihven reng a, an nat angin a na reng a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: